پاشنیوه‌رۆی ئه‌مرۆ شه‌ممه دانیشتنی ئه‌نجومه‌نی نوێنه‌رانی عێراق به سه‌رۆكایه‌تی محه‌مه‌د حه‌لبوسی سه‌رۆكی ئه‌نجومه‌نی نوێنه‌ران ده‌ستی پێكرد.
دانیشتنی ئه‌مرۆی په‌رله‌مانی عێراق تایبه‌ت ده‌بێت به یه‌كلاییكردنه‌وه‌ی و ده‌نگدان له‌سه‌ر یاسای نوێی هه‌ڵبژاردن به تایبه‌ت مادده‌ی پازده‌ی یاسه‌كه له باره‌ی بازنه‌كانی هه‌ڵبژاردن، تاوتوێ ده‌كرێت و ده‌نگی له‌سه‌ر ده‌درێت كه ئه‌م مادده‌یه بۆته جێگه‌ی ناكۆكی و گفتوگۆی لایه‌نه سیاسییه‌كان و ڕای جیاوازی له باره‌یه‌وه هه‌یه.
بۆ ئه‌م مه‌به‌سته‌ش محه‌مه‌د حه‌لبوسی داوای له سه‌رۆك فراكسیۆنه‌كان كردووه به جیا كۆبوونه‌وه‌یه‌ك له‌گه‌ڵ لیژنه‌ی یاسایی ئه‌نجومه‌نی نوێنه‌ران ئه‌نجامبده‌ن و بگه‌نه رێككه‌وتن.
حسێن هنداوی راوێژكاری سه‌رۆكایه‌تی ئه‌نجومه‌نی وه‌زیرانی عێراق بۆ كاروباری هه‌ڵبژاردنه‌كان به كوردستان تیڤی رایگه‌یاند: پێویسته ئه‌نجومه‌نی نوێنه‌رانی عێراق به زووترین كات ده‌نگ له‌سه‌ر پڕۆژه یاسای نوێی هه‌ڵبژاردن بدات بۆ ئه‌وه‌ی كۆمسیۆنی باڵای هه‌ڵبژاردنه‌كانی عێراق ئاماده‌كارییه‌كانی بۆ ئه‌نجامدانی هه‌ڵبژاردنه‌كانی مانگی حوزه‌یرانی ساڵی داهاتوو ده‌ستپێبكات و تۆماری بایۆمه‌تری ده‌نگده‌ران نوێ بكاته‌وه.
له دانیشتنه‌كه‌ی ئه‌مڕۆی ئه‌نجومه‌نی نوێنه‌رانی عێراق گفتوگۆ له باره‌ی فره بازنه‌یی هه‌ڵبژاردنه‌كان و یه‌ك بازنه‌یی ده‌كرێت و ئه‌م بڕگه‌یه به ده‌نگدان یه‌كلایی ده‌كرێته‌وه.
شایه‌نی باسه بڕیارە لە مانگی حوزەیرانی 2021، هەڵبژاردنی پێشوەختە لە عێراق ئەنجام بدرێت.
کۆمێنت (0)
تا ئێستا هیچ کۆمێنتێک نەکراوە.