له میانه‌ی به‌شداریكردن له به‌رنامه‌ی رۆژه‌ڤی كوردستان فارس عیسا سه‌رۆكی نوێنه‌رایه‌تی حكومه‌تی هه‌رێمی كوردستان له به‌غدا سه‌باره‌ت به پرسی ئاسایی كردنه‌وه‌ی ره‌وشی ناوچه كوردستانییه‌كان و رێككه‌وتنی نێوان حكومه‌تی هه‌رێمی كوردستان و حكومه‌تی عێراق تایبه‌ت به شنگال رایگه‌یاند
یه‌كێك له ستراتیژه‌یه‌تی حكومه‌تی هه‌رێم دانوستانه‌كانی له گه‌ڵ به‌غدا له رێگه‌ی ده‌ستووره‌وه چاره‌سه‌ر بكات و بۆ ئه‌و مه‌به‌سته له گه‌ڵ پێكهاتنی كابینه‌ی 9ی حكومه‌تی هه‌رێم هه‌ر له یه‌كه‌م رۆژ سه‌رۆكی حكومه‌ت سه‌ردانی به‌غدای كرد بۆ ئه‌وه‌ی ته‌واوی كیشه‌وگرفته‌كانی نێوان هه‌ردوولا چاره‌سه‌ر بكرێت و بۆ ئه‌و مه‌به‌سته‌ش چه‌ندین لێژنه پێكهێنرا بۆ ئه‌و پرسانه‌ی كه تا ئێستا یه‌كلا نه‌كراوه‌ته‌وه به‌تایبه‌تی پرسی ناوچه كوردستانیه‌كانی ده‌ره‌وه‌ی ئیداره‌ی هه‌رێم .
روونیشیكرده‌وه كه دوێنێ رێككه‌ونێك واژوكرا له نێوان حكومه‌تی هه‌رێم و حكومه‌تی عێراق بۆ ئاسایی كردنه‌وه‌ی بارودۆخی شنگال، بۆ ئه‌وه‌ی خه‌ڵكی ناوچه‌كه به سه‌رفرازی بگه‌رێنه‌وه سه‌ر ماڵ و حاڵی خۆیان.
ئه‌وه‌ش ده‌ستكه‌وتێكی حكومه‌تی هه‌رێمی كوردستانه ، به‌ڵام پێویسته ئه‌و رێككه‌وتنه له رووی پراكتیكیه‌وه جێبه‌جێ بكرێت و هه‌موو لایه‌ك و لێژنه‌كان كار بۆ جێبه‌جێكردنی ناوه‌رۆكی رێككه‌وتنه‌كه بكه‌ن .
ئاماژه‌ی به‌وه‌ش دا كه ئه‌و رێككه‌وتنه كاریگه‌ری ده‌بێت بۆ سه‌ر ناوچه‌كانی دیكه‌ی ده‌ره‌وه‌ی ئیداره‌ی هه‌رێم ، كه دوای رووداوه‌كانی 16ی ئۆكتۆبه‌ر بارودۆخێكی نه‌خوازراو دروست بوو بۆیه ئه‌و رێككه‌وتنه گرنگیه‌كی گه‌وره‌ی ده‌بێت له سه‌ر ناوچه‌كانی دیكه‌ش كه ئاسایی ببنه‌وه و كاری له سه‌ر بكرێت، ئه‌وه‌ش ئه‌ولیه‌تی كارو به‌رنامه‌ی كابینه‌ی 9ی حكومه‌تی هه‌رێمی كوردستان بووه .
فارس عیسا رایگه‌یاند كه شنگال ببوه گۆره‌پانێكی ململانێی نێوده‌وڵه‌تی و خه‌ڵكی ناوچه‌كه زوڵمێكی گه‌وره‌ی لێكرا له ماوه‌ی رابردوو بۆیه هه‌ر رێككه‌وتنێك پێویسته له رێگه‌ی كه‌ناڵی فه‌رمی و له رێگه‌ی ده‌ستوور جێبه‌جێ بكرێت و رێكاری ده‌ستووری په‌یڕه‌و بكرێت ، جه‌خت له سه‌ر لایه‌نه‌كانی ئیداری و ئه‌منی و خزمه‌تگوزاری بكرێته‌وه ئه‌ویش له رێگه‌ی رێكاری یاسایی و ده‌ستووری .
ئه‌و رێككه‌وتنه بۆته هۆی گرنگیدان له لایه‌ن وڵاتانی زلهێز وه‌ك ئه‌مه‌ریكا و هه‌روه‌ها رێكخراوه نێوده‌وڵه‌تیه‌كان، ئه‌مه‌ش مانای خۆی هه‌یه ، جگه له‌وه‌ش عێراق ناتوانێت سه‌قامگیری به‌خۆوه ببینێت ئه‌گه‌ر هاتوو ئه‌و پرسه هه‌ڵواسراوانه‌ی نێوان هه‌ولێر و به‌غدا یه‌كلایی نه‌كرێنه‌وه .
جه‌ختی له‌وه‌ش كرده‌وه كه ئه‌و گروپه كه‌سیانه‌ی كه بوونیان هه‌یه به پێی ئه‌و رێككه‌وتنه به‌رژه‌وه‌ندیه‌كانیان ده‌كه‌وێته مه‌ترسیه‌وه بۆیه هه‌وڵ ده‌ده‌ن ئاسته‌نگ دروست بكه‌ن ، بۆیه سه‌ركه‌وتنی ئه‌و رێككه‌وتنه ده‌بێته هۆی نه‌مانی ئه‌و گروپانه .
ئه‌و گروپ و ئه‌و خه‌ڵكانه نوێنه‌رایه‌تی خه‌ڵكی شنگال ناكه‌ن. بۆیه خه‌ڵكی شنگال له ئاواره‌یی ماونه‌ته‌وه و نه‌یانویستووه به زه‌لیلی بژین .
به پێی رێككه‌وتنه‌كه پێویسته ره‌وشی ناوچه‌كه ئاسایی بكرێته‌وه له رووی ئیداری و ئه‌منی و خزمه‌تگوزاری .
له رووی ئیداری كه‌سایه‌تییه‌ك وه‌ك به‌رپرسی ناوچه‌كه هه‌لبژیردرێت كه ره‌زامه‌ندی هه‌ردوو لایه‌نی له سه‌ر بێت حكومه‌تی هه‌رێم و حكومه‌تی عێراقی ، دواتر له رووی ئه‌منی ته‌نها پۆلیس و چه‌ند ده‌زگایه‌كی ئه‌منی ئه‌ركی پاراستنی ناوچه‌كه‌ی له ئه‌ستۆدا بێت ئه‌و هێزانه بچنه ده‌ره‌وه ، هه‌روه‌ها ئه‌و هێزانه‌ی كه نامۆن ده‌بێت ناوچه‌كه جێبهێڵن و ده‌ست له كاروباری ناوچه‌كه وه‌رنه‌ده‌ن . له‌رووی خزمه‌تگوزاریشه‌وه كه هه‌موو ده‌زانیین 80%ی شنگال رووخاوه و پێویسته بنیاد بنرێته‌وه .
گه‌راندنه‌وه‌ی خه‌ڵكی شنگال واتا گه‌راندنه‌وه‌ی ئیراده‌ی ئێزیدیان بۆ ئه‌وه‌ی بتوانن له ئاینده نوێنه‌ری راسته‌قینه‌ی خۆیان هه‌لبژێرن له ئه‌نجومه‌نی نوێنه‌رانی عیراق .
کۆمێنت (0)
تا ئێستا هیچ کۆمێنتێک نەکراوە.