عادل روكابی، وه‌زیری كار و كاروباری كۆمه‌ڵایه‌تی عێراق، سه‌ردانی وه‌زاره‌تی كار و كاروباری كۆمه‌ڵایه‌تی ھه‌رێمی كوردستانی كرد و له‌گه‌ڵ وه‌زیری كار و كاروباری كۆمه‌ڵایه‌تی ھه‌رێم، كوێستان محه‌مه‌د كۆبوونه‌وه.
وه‌زیری كار و كاروباری كۆمه‌ڵایه‌تی عێراق، وه‌زیری كار و كاروباری كۆمه‌ڵایه‌تی ھه‌رێمی كوردستان دوای كۆبوونه‌وه‌كه له كۆنگره‌یه‌كی رۆژنامه‌وانییدا، ته‌وه‌ری كۆبوونه‌وه‌كه‌یان خسته‌ڕوو و ئاماژه‌یان به‌ناوه‌ڕۆكی كۆبوونه‌وه‌كه كرد.
سه‌ره‌تا عادل روكابی، وه‌زیری كار و كاروباری كۆمه‌ڵایه‌تی عێراق، گوتی: له كۆبوونه‌وه‌كه‌دا باسمان له‌و بابه‌تانه كرد كه پێشتر له‌نێوان ھه‌ردوو وه‌زاره‌تی كار و كاروباری ھه‌رێم و عێراق قسه‌ی له‌سه‌ر كرابوو، ئێستاش ھاتووین بۆ گفتوگۆكردن و ته‌واوكردنی ئه‌و خاڵانه‌ی كه پێستر گفتوگۆیان له‌سه‌ر كرابوو، له‌م سه‌ردانه‌مدا سه‌ردانی خانه‌ی به‌ساڵاچووان و بێسه‌رپه‌رشتانمان كرد و دۆخی خزمه‌تگوزارییه‌كانمان تاوتوێ كرد.
عادل روكابی گوتیشی: رێككه‌وتین له‌سه‌ردرێژه‌دان به په‌ره‌پێدانی په‌یوه‌ندییه‌كان و ئه‌وه‌ی ئه‌مڕۆ گفتوگۆمان له‌سه‌ر كرد پێكھێنانی دوو لیژنه‌یه بۆ به‌رده‌وامی و ھه‌ماھه‌نگی له‌نێوان جێبه‌جێكردنی ئه‌و بابه‌تانه‌ی رێككه‌وتنی له‌سه‌ر كراوه.
له‌لایه‌ن خۆیه‌وه كوێستان محه‌مه‌د، وه‌زیری كار و كاروباری كۆمه‌ڵایه‌تی ھه‌رێمی كوردستان، گوتی: ئامانجی سه‌ردانه‌كه‌ی وه‌زیری كار و كاروباری كۆمه‌ڵایه‌تی عێراق ھه‌ماھه‌نگی و گۆڕینه‌وه‌ی ئه‌زموونه له‌نێوان ھه‌ردوولادا و كۆمه‌ڵێك خاڵ كه ماوه‌یه‌كه به ھه‌ڵواسراوی ماوه‌ته‌وه و بۆ چاره‌سه‌كردنیان قسه‌ی له‌سه‌ر كرا".
كوێستان محه‌مه‌د گوتیشی: چه‌ند داواكاری و پێشنیازێكمان خسته‌به‌رده‌م وه‌زیری كار و كاروباری كۆمه‌ڵایه‌تی عێراق و وه‌ڵامی ئه‌رێنییان ھه‌بوو، چه‌ند لیژنه‌یه‌ك پێكدێت كه ھه‌ندێكیان پێویستی به سه‌ردان ھه‌یه بۆ به‌غدا بۆ گفتوگۆكردن له‌سه‌ر چه‌ند بابه‌تێكی په‌یوه‌ندار وه‌كو، بابه‌تی ته‌ندروستی و سه‌لامه‌تی پیشه‌یی كه ئه‌وان ھاوكاریمان ده‌بن.
وه‌زیری كار و كاروباری كۆمه‌ڵایه‌تی ھه‌رێمی كوردستان ئاماژه‌ی به ته‌وه‌رێكی دیكه‌ی كۆبوونه‌وه‌كه كرد و گوتی: له‌سه‌ر بابه‌تی یاسای كار و یاسای ده‌سته‌به‌ری كۆمه‌ڵایه‌تی قسه‌مان كردووه و لیژنه پێكده‌ھێنین و ئه‌زموونی یه‌كتر ده‌گۆڕینه‌وه و ھه‌ندێك بابه‌ت ھه‌یه كه په‌یوه‌سته به ھه‌ردوولا.
کۆمێنت (0)
تا ئێستا هیچ کۆمێنتێک نەکراوە.