لیژنه‌ی په‌روه‌رده‌و خوێندنی باڵا چه‌ند پرسێکی گرنگ تاووتوێ ده‌کات

 لیژنه‌ی په‌روه‌رده‌و خوێندنی باڵاو توێژینه‌وه‌ى زانستی له‌په‌رله‌مانى كوردستان بڵاوی كرده‌وه‌ كه‌  به‌سه‌رپه‌رشتی عه‌بدولسه‌لام دۆله‌مه‌ری سه‌رۆكی لیژنه‌و ئاماده‌بوونى جێگرى سه‌رۆكی لیژنه‌و بڕیارده‌رو ئه‌ندامان و راوێژكارانی لیژنه‌كه‌ کۆبوونەوەی ئاسایی  لێژنه‌كه‌ به‌رێوه‌چوو 

راشیده‌گه‌یه‌نن كه‌له‌ ‌سه‌ره‌تای كۆبوونه‌وه‌كه‌ سه‌رجه‌م ئه‌و نووسراو و یاداشت و داواكارییانه‌ی ئاراسته‌ی لیژنه‌كه‌‌ كرابوون به‌مه‌به‌ستی چاره‌سه‌رو به‌دواداچوون ئاراسته‌ی لایه‌نی په‌یوه‌ندیدار كران.

ئاماژه‌ به‌وه‌ش ده‌كه‌ن كه‌ له‌ به‌شێكی تری كۆبوونه‌وه‌كه‌ تایبه‌ت بوو به‌باسكردن و گفتوگۆكردن له‌سه‌ر ده‌ستپێكی ساڵی تازه‌ی خوێندن و دواین پێشهاته‌كان و جه‌خت له‌وه‌ كرایه‌وه‌ كه‌پێویسته‌ له‌ناوه‌نده‌كانی خوێندن به‌ته‌واوی ڕێنماییه‌كانی خۆپارێزی جێبه‌جێ بكرێت بۆئه‌وه‌ی قوتابیان و مامۆستایان دووربن له‌م په‌تایه‌و پرۆسه‌ی خوێندن به‌باشی به‌ڕێوه‌ بچێت.

هه‌ر له‌كۆبوونه‌وه‌كه‌دا‌ گفتوگۆكرا له‌سه‌ر كێشه‌ی داننان به‌بڕوانامه‌و گرفتی هه‌بوونی مۆڵه‌تی فه‌رمیی زانكۆی سترانفۆردی ئه‌مریكی و گرفتی قوتابیانی خوێندنی باڵا لەزانکۆی سۆران و ناوونیشان و بڕاوانامەی دەرچووانی کۆلێژی زانستە تەندروستییەکان و وەرگرتنی دەرچووانی ئامادەییە پیشەییەکان لەزانکۆو پەیمانگه‌کان و کەمکردنەوەی کرێی خوێندن و چەند بابەتێکی تری پەیوەست بەسێکتەری پەروەردەو خوئندنی باڵا، بۆ ئه‌م مه‌به‌سته‌ش بڕیاردرا چەند لیژنه‌یه‌كی لاوه‌كی پێكبهێندرێت و به‌دواداچوونی زیاتر بۆ ئه‌م پرسانه‌ بكرێت.

دارشتنه‌وه‌ى هه‌واڵ - شوان عه‌زیز