ئه‌مڕۆ شاندی وه‌زاره‌تی پێشمه‌رگه‌ی هه‌رێمی كوردستان بۆ كۆبوونه‌وه له‌گه‌ڵ وه‌زاره‌تی به‌رگریی عێراق، به‌ره‌و به‌غدا به‌ڕێكه‌وت.
فه‌ریق جه‌بار یاوه‌ر، ئه‌مینداری گشتیی وه‌زاره‌تی پێشمه‌رگه‌ی هه‌رێمی كوردستان، له لێدوانێكدا رایگه‌یاند : شانده‌كه لیژنه‌ی باڵای هه‌ماهه‌نگی سه‌ربازیی و ئه‌منیی وه‌زاره‌تی پێشمه‌رگه‌یه، دوای چه‌ندین كۆبوونه‌وه له‌نێوان هه‌ردوولا، به‌ئامانجی به‌رده‌وامیدان به گفتوگۆكان له‌گه‌ڵ وه‌زاره‌تی به‌رگریی عێراق ده‌چینه به‌غدا و له‌گه‌ڵ لیژنه‌ی هه‌ماهه‌نگی سه‌ربازیی و ئه‌منیی وه‌زاره‌تی به‌رگریی عێراق (فه‌رمانده‌یی هێزه هاوبه‌شه‌كان) كۆده‌بینه‌وه.
ده‌رباره‌ی ته‌وه‌ری گفتوگۆكانیش جه‌بار یاوه‌ر گوتی: گفتوگۆكان له‌سه‌ر سێ بابه‌تی سه‌ره‌كی ده‌بێت، یه‌كه‌م دامه‌زراندنی ناوه‌ندی هه‌ماهه‌نگی له‌نێوان ئه‌فسه‌رانی هێزه‌كانی پێشمه‌رگه و سوپای عیراق، دووه‌م دامه‌زراندنی هێڵی هاوبه‌شی به‌رگریی بۆ به‌ره‌نگاربوونه‌وه‌ی داعش، سێیه‌م ئه‌نجامدانی ئۆپه‌راسیۆنی سه‌ربازی دژبه داعش، ئه‌مانه هه‌مووی له سنووری پارێزگاكانی كه‌ركووك، دیاله و نه‌ینه‌وا ده‌بێت.
کۆمێنت (0)
تا ئێستا هیچ کۆمێنتێک نەکراوە.