لیژنه‌ی كاروباری ته‌ندروستی میوانداریی وه‌زیری ته‌ندروستی ده‌كات
به‌مه‌به‌ستی گفتوگۆكردن له‌سه‌ر چه‌ند پرسێكی ته‌ندروستی، نیوه‌ڕۆی ئه‌مڕۆ دووشه‌مه 2020/11/2، لیژنه‌ی كاروباری ته‌ندروستی و ژینگه‌و مافی به‌كاربه‌ر له‌په‌رله‌مانی كوردستان به‌سه‌رپه‌رشتیی د.سه‌باح زێباری سه‌رۆكی لیژنه‌و ئاماده‌بوونی جێگرى سه‌رۆكی لیژنه‌و بڕیارده‌رو ئه‌ندامان و ڕاوێژكارانی لیژنه‌كه كۆبوونه‌وه‌ی ئاسایی خۆی ئه‌نجامدا.
لێژنه‌كه راگه‌یاندراوێكی بڵاوكرده‌وه رایده‌گه‌یه‌نن كه له‌سه‌ره‌تای كۆبوونه‌وه‌كه گفتوگۆكرا له‌سه‌ر دۆخی ته‌ندروستیی هه‌رێمی كوردستان به‌گشتی و دواین پێشهاته‌كانی ڤایرۆسی كۆڕۆناو هه‌ڵكشانی ڕێژه‌ی تووشبووان و گیانله‌ده‌ستدان، دوای خستنه‌ڕووی سه‌رنج و بۆچوونه‌كان له‌لایه‌ن سه‌رۆكایه‌تیی لیژنه‌كه‌و ئه‌ندامانه‌وه بڕیاردرا كه له‌ئاینده‌یه‌كی نزیكدا میوانداریی وه‌زیری ته‌ندروستی بكرێت بۆ له‌نزیكه‌وه ئاگاداربوون له ڕه‌وشی ته‌ندروستی و ڕێكاره‌كانی خۆپارێزی و پلانی داهاتووی حکومەتی ھەرێم بۆ ڕیگه‌گرتن له‌زیادبوونی ڕێژه‌ی تووشبوون و گیانله‌ده‌ستدان به‌م ڤایرۆسە.
هه‌روه‌ها ئاماژه به‌وه‌ش ده‌كه‌ن كه له‌به‌شێكی تری كۆبوونه‌وه‌كه‌دا باس له‌بابه‌تی ڕێنماییه‌كانی مۆڵه‌تی فه‌رمانبه‌ران كرا كه‌خاوه‌نی منداڵی نه‌خۆشن و نه‌خۆشییه‌كانیان درێژخایه‌نه‌و له‌ئێستادا گرفت بۆ به‌شێك له‌م فه‌رمانبه‌رانه دروستبووه‌و بۆ له‌نزیكه‌وه ئاگاداربوون، بڕیاردرا لیژنه‌یه‌كی لاوه‌كی سه‌ردانی وه‌زاره‌تی كاروكاروباری كۆمه‌ڵایه‌تی بكات بۆ به‌دواداچوونى ئه‌و بابه‌ته به‌مه‌به‌ستی چاره‌سه‌ركردنی و هه‌وڵبدرێت كه‌كارئاسانیی ته‌واو بكرێت بۆ ئه‌وه كه‌سانه‌ی ئه‌م ڕێنماییه ده‌یانگرێته‌وه.
شوان عه‌زیز
کۆمێنت (0)
تا ئێستا هیچ کۆمێنتێک نەکراوە.