مهحما خهلیل راگههاند: ههر دهمهك ئاسایش ههبیت و خزمهتگۆزاری ڤهگهرن بۆ شنگالێ دێ ئاواره ب خوه ڤهگهرن.
لدور رێكهفتنا دناڤ بهرا حكومهتا ههرێما كوردستانێ و حكومهتا فیدرال لدور ئاسائیكرنا رهوشا شنگالێ دا، قایمقامێ شنگالێ مهحما خهلیل راگههاند: سێ لیوا یێن پولیسێن ئێتحادی ژ سینورێ پارێزگهها كهركوكێ گههشتینه پارێزگهها نهینهوا و لسنورێ شنگال هاتنه جێگیركرن، یهك ل باكوور و باشوورێ چیایێ شنگال و كۆمهلگهها خانهسۆر و ههندهك ل گوندێ وهردییه و ههندهك دی ژی ل سنورێ ناحیا قهحتانییه.
دوپاتكر كو هژمارا وان هێزیێن كو دێ ل دهڤهرێن سنووری دگهل وهلاتێ سوریا هێنه بهلاڤكرن دوهزار و پێنجسهد پولیسن.
لدۆر ڤهگهرا ئاوارهیان ژی ئاماژه ب وێ ئێكێ كر كو ههر دهمهك ئاسایش ههبیت و خزمهتگۆزاری ڤهگهرن بۆ شنگالێ دێ ئاواره ب خوه ڤهگهرن.
ژ لایێ خوه ڤه پارێزگارێ نهینهوا نهجم ئهلجبوری تهكهز كر كو بجھكرنا رێكهفتنا شنگالێ دناڤبهرا حكومهتا فیدرالی و حكومهتا ههرێما كوردستانێ دا، دێ ئاسایشا دهڤهرێ و سهلامهتیا ئیزیدیان پارێزیت و دهرگهھ ژبۆ ڤهگرا ئاوارهیان ڤهكت.
ئهلجبوری پێشبینی كر كو د دهستپێكا مهها داهاتی دا رێكهفتن بكهڤت وارێ بجھكرنێ دا.
تێ زانین كو بهغدا و ههولێر ل نههێ تشرینا ئێكێ لسهر ئاسائیكرنا رهوشا شنگالێ و برێڤهبرنا ههڤ بهش و گههاندنا خزمهتگوزارییان رێككهفتن. ههر ل گۆر وێ رێكهفتنێ ئهركێ پولیسێن ئتیحادیه شنگالێ ژ ههموو كروپێن چهكدار و حهشدا شهعبی و چهكدارێن پهكهكێ ڤالا بكهت
کۆمێنت (0)
تا ئێستا هیچ کۆمێنتێک نەکراوە.