لاوێکی کورد لە تاران پاش دەستگیرکردنی لە ژێر ئەشکەنجەدا کوژرا

لاوێكی كورد كه‌ خەڵکی دیواندەرە کە لە لایەن هێزە ئەمنییەتییەکانەوە لە تاران دەستگیر کرابوو، لە ژێر ئەشکەنجەدا کوژرا.

 رێكخراوی هه‌نگاو بۆ مافه‌كانی مرۆڤ بڵاوی كرده‌وه‌: کاتژمێر 5ی ئێوارەی رۆژی دووشەممە 8 ى 2 ى 2021 ،  هێزە ئەمنییەتییەکانی تاران لە مێترۆی ئەو شارە هاووڵاتییەکی کوردیان بە ناوی (مێهرداد تاڵشی) تەمەن 21 ساڵ و خەڵکی دیواندەرە لەگەڵ کەسێکی دیکەدا دەستگیرکراوە. 

هه‌نگاو ئاماژه‌ بۆ ئه‌وه‌ش ده‌كات: كه‌بە وتەی سەرچاوەیەکی نزیک لە بنەماڵەی مێهرداد تاڵشی، کاتژمێر 10ی شەوی ئەو رۆژە ناوبراویان گواستۆتەوە بۆ ئیدارەی ئاگاهی شاپوور و هەر لەوێدا لە ژێر ئەشکەنجەدا گیانی لە دەست داوە بە شێوەیەک کە ئاسەواری کوتان و لێدان بە سەر و ملیەوە بە روونی بینراوە.

سەرچاوەکانی هەنگاو رایانگەیاندووە" کە تەرمی مێهرداد تالشی پاش پشکنینی پزیشکی دراوەتەوە بە بنەماڵەکەی و دوێنێ لە ژێر چاودێری توندی ئەمنییەتی لە سنە بە خاک سپێردرا و لە رێوڕەسمی سەرخۆشییەکەشی لە دیواندەرەوە، هێزە ئەمنییەتییەکان بە تەواوی جووڵەی خەڵکیان کۆنترۆڵ کردووە.