راوێژكاری باڵای سه‌ربازی ئه‌ڵمانیا له‌هه‌رێم، رایده‌گه‌یێنێت، كه ووڵاته‌كه‌ی له‌هاوكاری و هه‌مه‌ئاهه‌نگی له‌گه‌ڵ وه‌زاره‌تی پێشمه‌رگه به‌رده‌وام ده‌بێت، دووپاتیشیده‌كاته‌وه: ده‌یانه‌وێت رۆڵ و كاریگه‌ری خۆیان له‌پڕۆسه‌ی رێفۆرمی سه‌ربازی وه‌زاره‌ت زیاتر و فراونتر بكه‌ن.
ئه‌مڕۆ 9ی 2ی 2021 شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان، له‌گه‌ڵ كۆلۆنێل جۆرج، راوێژكاری سه‌ربازی هێزه‌كانی ئه‌ڵمانیا و وه‌فدی یاوه‌ری كۆبۆوه.
له‌كۆبونه‌وه‌كه‌دا، وه‌زیری پێشمه‌رگه رایگه‌یاند: هاوكارییه‌كانی و هه‌ماهه‌نگییه‌كانی ئێوه، پڕبایه‌خ و گرنگن له‌به‌رزكردنه‌وه‌ی توانستی زانستی هێزه‌كانی پێشمه‌رگه، وتیشی: به‌خۆشحاڵیه‌وه له‌گه‌ڵ ئێوه به‌رده‌وام ده‌بین و به‌یه‌كه‌وه ئاسایش و سه‌قامگیری ناوچه‌كه له‌مه‌ترسییه‌كانی تیرۆر و تیرۆریستانی داعش دوورده‌خه‌ینه‌وه.
راوێژكاری سه‌ربازی هێزه‌كانی ئه‌ڵمانیا له‌هه‌رێم، رایگه‌یاند: ئه‌وان دڵخۆشن به ئاراسته‌ی به‌ڕێوه‌چوونی چاكسازی له‌وه‌زاره‌تی پێشمه‌رگه‌دا، رایانگه‌یاند: له‌مپه‌ر و ئاسته‌نگه‌كان، بچووكترن له‌و ئیراده به‌هێزه‌‌ی كه بۆ چاكسازی هه‌یه، له‌مڕوه‌وه هاوكار و هه‌ماهه‌نگیمان فراونتر و باشتر ده‌بێت.
كۆبوونه‌وه، جه‌ختیكرده‌وه به له‌به‌رچاوگرتنی ئه‌و قۆناغه‌ی ناوچه‌كه‌ی پێدا تێده‌په‌رێت، په‌یوه‌ندییه‌كانی نێوان سوپای عێراق و هێزی پێشمه‌رگه پته‌وتر بكرێت، كه له‌ده‌رئه‌نجامدا شكستپێهێنانی تێرۆر و تیرۆریستانی لێده‌كه‌وێته‌وه.
هاوكات هه‌ردوولا هاوڕابوون، كه پرسی باشكردنی ژیان و گوزه‌رانی هێزی پێشمه‌رگه له‌رێگه‌ی چاكسازی و هاوكاری لۆجیستی و سه‌ربازی و راوێژكاری هاوپه‌یمانان به‌رده‌وامی هه‌بێت.
کۆمێنت (0)
تا ئێستا هیچ کۆمێنتێک نەکراوە.