ب ئاماده‌بوونا پارێزگارێ دهۆکێ رێ ورسمێن ڤه‌شارتنا ته‌رمێ د.ئارام باڵەتە‌یى هاتنه‌ گێران

ئه‌ڤرو سپێدێ  17/2/2021 ل گورستانا گوندێ باڵێته‌ ب ئاماده‌بونا به‌رێزان  د.على ته‌ته‌ر  پارێزگارێ دهۆكێ وچه‌ند به‌رپرسێن حزبى وئیدارى و له‌شكرى ورێ سپى وماقولێن ده‌ڤه‌رێ رێ ورسمێن ڤه‌شارتنا ته‌رمێ د.ئارام باڵەتە‌یى هاتنه‌ گێران.

پارێزگارێ دهۆكێ دپه‌یڤه‌كێدا: بناڤێ خو وكارگێریا پارێزگه‌هێ وسه‌ركردایه‌تیا پارتى وسازیێن سیاسى وله‌شكرى  سه‌ره‌خوشى ل بنه‌ماڵا خودێ ژێ رازى و هه‌موو كه‌س وكار ودوست وهه‌ڤالێن ره‌حمه‌تى كرن وژیه‌زدانێ مه‌زن خواست كو جهێ وى بكه‌ته‌ به‌هه‌شتا به‌رین وسه‌بر وهه‌دارێ بده‌ته‌ هه‌موو لایه‌كى.

هه‌روه‌سا گوت: به‌رى 14روژا بابێ دكتور ئارامى ژى خه‌باتكه‌ر ناجى باڵێته‌یى دوماهى ب ژیانا خو ئینابو وئه‌ڤان هه‌ردوو روودانا ئه‌م هه‌موو غه‌مگینكرین وژیه‌زدانێ دلوڤان دخوازین  كو جها هه‌ردوویان بكه‌ته‌ به‌هه‌شتا به‌رین.

د.على ته‌ته‌ر رولێ د.ئارام ئه‌ندامێ په‌رله‌مانێ عیراقا فیدرال په‌یڤدارێ فراكسیونا پارتى ژبو به‌ره‌ڤانیكرنێ ژمافێن هه‌رێما كوردستانێ دناڤا په‌رله‌مانێ عیراقێ دا به‌رچاڤكر وگوت: هه‌موو هه‌ول وبزاڤ دگه‌ل لایه‌نێن سه‌ره‌كى دناڤ په‌رله‌مانێ عیراقێ دا دكرن بو بده‌ستڤه‌ئینانا مافێن خه‌لكێ هه‌رێما كوردستانێ، هه‌روه‌سا گوت: سه‌ركردایه‌تیا هه‌رێمێ ژسه‌روك بارزانى وسه‌روكێ هه‌رێمێ وسه‌روكێ حكومه‌تا كوردستانێ به‌رده‌وام دووڤ چونا ره‌وشا دكتور ئارامى دكر ول ساخله‌میا وى دپرسین لێ جهێ داخێ یه‌ سه‌ره‌رایى هه‌ول بزاڤێن به‌رده‌وام بو چاره‌سه‌ركرنا نه‌خوشیا وى دكتور ئارامى گیانێ خو ژده‌ستدا وڤالاتییه‌كا به‌رچاڤ لدووڤ خو هێلا.

پارێزگارێ دهۆكێ خواست كو گه‌نجێن ڤى سه‌رده‌مى دكتور ئارامى بوخو بكه‌نه‌ نمونا زیره‌كى وسه‌ركێشیێ وخواست خودێ  جهێ ره‌حمه‌تى  وهه‌موو قوربانیێن نه‌خوشیا كورونایێ بكه‌ته‌ به‌هه‌شتا به‌رین.

ل دوماهیێ گوت: مه‌ترسیا كورونایێ یا به‌رده‌وامه‌ وخواست كو هاولاتى به‌رده‌وام پێگریێ ب رێنمایێن خو پارێزیێ بكه‌ن وخو  ژنه‌خوشیا كورونایێ ب پارێزن .

پاش جودا جودا په‌یڤێن بشاركیكى وڤیان سه‌برى ئه‌ندامێن په‌رله‌مانێ عیراقا فیدرال هاتنه‌ خاندن وسه‌رخوشیێن خو وئه‌ندامێن په‌رله‌مانى گه‌هاندنا بناماڵا خودێ ژێ رازى وژیه‌زادانێ دلوڤان خواست كو خودێ جهێ وى بكه‌ته‌ به‌هه‌شتا به‌رین.

هه‌ژى گوتنێ یه‌ د.ئارام ل سالا 1979 ژدایك بویه‌ وئه‌ندام په‌رله‌مانێ عیراقێ یێ ڤێ خولێ بویه‌ ول روژا 18-11-2020ل به‌غدا توشى كورونایێ بویه‌ و(80) روژا ل نه‌خوشخانا وان گلوبال ل باژێرێ دهۆكێ  لبن چاڤدێریا چر یا نوشدارا بویه‌ وئه‌ڤرو 17-2-2021ده‌مژمێرنه‌هى سپێدێ گیانێ خو ژده‌ست دا.