دانوستاننێن شاندێ حكومه‌تا هه‌رێما كوردستانێ و لایه‌نێن عێراقی لدور بجهكرنا پشكا هه‌رێما كوردستانێ د پروژێ یاسایا بودجه‌یا سالا دوهزار و بیستوئێكێ به‌رده‌وامه.
ئه‌ندامێ چڤاتا نوینه‌رێن عێراقێ، محه‌مه‌د ئه‌مین فارس بو كوردستان تیڤیراگه‌هاند، هه‌تا نها كفتوگو و دانوستاندن ده‌ربارێ بجهكرنا پشكا هه‌رێما كوردستانێ د پروژێ بودجه‌یا حكومه‌تا فیدرال دا دبه‌رده‌وامن و ل رێككه‌فتنێ نێزیك بوینه.
و گوت، حكومه‌تا هه‌رێما كوردستانێ هه‌می مه‌جێن دستوریێن لایه‌نێن عێراقی په‌سه‌ندكرینه، به‌لێ هه‌تا نها كوده‌نگی دناڤ لایه‌نێن شیعی لدور بودجه‌یێ بشێوه‌یه‌كێ گشتی و پشكا هه‌رێما كوردستانێ بتایبه‌تی دورست نه‌بویه.
دوپاتكر كو دروژێن بێهێت دا گوتوبێژێن شاندێ هه‌رێما كوردستانێ و لایه‌نێن عێراقی دێ دبه‌رده‌وامبن بمه‌ره‌ما رێككه‌فتنێ و ده‌ربازكرنا پروژێ بودجه‌یا سالا دوهزار و بیستوئێكێ.
محه‌مه‌د ئه‌مین فارس گوت: وه‌كو فراكسیونا پارتی دیموكراتی كوردستانێ ل چڤاتا نوینه‌رێن عێراقێ بهه‌می شیانێن خو هه‌ولدده‌ین و دێ به‌رگیریێ ژ ماف و شایسته‌یێن دارایێن خه‌لكێ هه‌رێما كوردستانێ كه‌ین.
کۆمێنت (0)
تا ئێستا هیچ کۆمێنتێک نەکراوە.