ئه‌مرۆ دووشه‌ممه 1ی ئاداری 2021، یه‌كه‌مین كۆبوونه‌وه‌ی بەڕێوەبەرانی گشتیی دیوان لە وەزارەتەکان و بەڕێوەبەرانی گشتیی کاروباری کارگێڕی و دارایی لە دەستەکان، به سه‌رپه‌رشتی د. ئومێد سه‌باح سه‌رۆكی دیوانی سه‌رۆكایه‌تیی ئه‌نجومه‌نی وه‌زیرانی به‌ڕێوه‌چوو.
له كۆبوونه‌وه‌كه‌دا، كە هەر یەکە لە بەڕێزان بریکاری وەزیری پلاندانان زاگرۆس فەتاح و سه‌رۆكی فه‌رمانگه‌ی كارگێری و دارایی ئه‌نجومه‌نی وه‌زیران ساناو فەرەیدوون جوانڕۆیی ئاماده‌یبوون، باس له كێشه دارایی و كارگێڕییه‌كانی دامه‌زراوه‌كانی حكومه‌ت و هه‌روه‌ها هه‌ماهه‌نگیی نێوان وه‌زاره‌ته‌كان و ئه‌نجومه‌نی وه‌زیران و نه‌هێشتنی رۆتین بۆ باشتر راپه‌راندنی كاروباری هاووڵاتییان و ده‌ستنیشانكردنی كه‌موكورتییه‌كان كرا.
ناوەڕۆکی کۆبوونەوەکە لە چوارچێوەی بەرنامەی کابینەی نۆیەم بۆ چۆنییەتی پیادە کردنی لامەرکەزییەتی ئیداری، پرۆسەی چاودێری و میکانیزمی جێبەجێکردنی بۆ کەمکردنەوی رۆتین بەڕێوەچوو.
بڕیاره كۆبوونه‌وه‌ی به‌رێوه‌به‌ره گشتییه‌كانی دیوانی وه‌زاره‌ته‌كان به شێوه‌ی مانگانه بۆ بەدواداچوون و چاره‌سه‌ركردنی كێشه كارگێڕییه‌كان به‌ردوام بێت.
کۆمێنت (0)
تا ئێستا هیچ کۆمێنتێک نەکراوە.