دوای نیوەڕۆی ئەمڕۆ دووشەمە، ئومێد خۆشناو، پارێزگاری هەولێر، لە دیوانی پارێزگا، پێشوازی لە هاکان کەراجای، سەرکونسڵی گشتیی وڵاتی تورکیا لەهەولێر و شاندێکی یاوەری کرد.
لەدیدارێکدا، باس لە هاوکاری و هەماهەنگی نێوان پارێزگای هەولێر و کونسڵخانەی گشتیی تورکیا کرا و تەئکید لەسەر پەرەپێدانی زیاتری پەیوەندییەکانی نێوان هەردوولا کرایەوە، پارێزگاری هەولێر، ئاماژەی بەوەدا دەرگای پارێزگای هەولێر بەڕووی سەرمایەگوزار و وەبەرهێنەرانی وڵاتی تورکیا کرایەوە و لەوبارەیەشەوە ئامادەیی هەر هاوکاری و ئاسانکارییەکین لەگەڵتان.
لەلایەن خۆیەوە سەرکونسڵی گشتیی وڵاتی تورکیا لەهەولێر، زۆر سوپاسی پارێزگاری هەولێری کرد بۆ ئەو پێشوازییە گەرمەی کە لێی کرا و تەئکیدی لەسەر پەرەپێدانی زیاتری پەیوەندییەکان و هاوکاری و هەماهەنگی نێوان هەردوولا کردەوە و ئامادەی خۆی و وڵاتەکەشی نیشاندا بۆ هەر هاوکاری و هەماهەنگییەک لەگەڵ پارێزگای هەولێر.
له‌لایه‌كی دیكه‌وه هه‌ر ئەمڕۆ، ئومێد خۆشناو، پارێزگاری هەولێر، لەدیوانی پارێزگا، پێشوازیکرد لە(زوهێر عەلی شەعلان) پارێزگاری دیوانیە و شاندێکی یاوەری.
لەدیدارەکەدا، وێڕای ئەوەی تەئکید لەپەرەپێدانی پەیوەندییەکانی نێوان هەردوولا کرایەوە، پارێزگاری دیوانیە ڕایگەیاند: "هیوادارین پەیوەندی و هه‌ماهه‌نگی و هاوکاریی نێوان پارێزگای هەولێر و پارێزگای دیوانیە پەری زیاتری پێبدرێت و تۆکمەتر و باشتری بێت".
لەلایەن خۆیەوە، پارێزگاری هەولێر وێڕای بەخێرهێنانی گەرمی پارێزگاری دیوانیه و شاندی یاوەری، خۆشحاڵی خۆی بەسەردانەکەیان دەربڕی و ڕایگەیاند: "بەتەئکید وەکو پارێزگای هەولێری پایتەختی هەرێمی کوردستان، دەمانەوێت پەیوەندیەکی تۆکمە و هه‌ماهه‌نگی و هاوکاریەکی پتەومان لەگەڵ سەرجەم پارێزگاکانی عێراق لە نێویشیاندا پارێزگای دیوانیە هەبێت".
کۆمێنت (0)
تا ئێستا هیچ کۆمێنتێک نەکراوە.