رژێمی به‌شار ئه‌سه‌د بانگه‌شه‌ی ئه‌وه ده‌كات كه ئیسرائیل بۆردومانی دیمه‌شق-ی پایته‌ختی كردووه.
ئاژانسی "SANA" زمانحاڵی رژێمی ئه‌سه‌د به پشتبه‌ستن به چه‌ند سه‌رچاوه‌یه‌كی سه‌ربازیی هه‌واڵی ئه‌وه‌ی بڵاوكردووه‌ته‌وه كه كاتژمێر 35:10ی شه‌وی رابردوو به كاتی سووریا، فڕۆكه جه‌نگییه‌كانی ئیسرائیل له به‌رزاییه‌كانی جۆلان-ه‌وه بۆردومانی ده‌ورووبه‌ری شاری دیمه‌شق-یان كردووه.
له هه‌واڵه‌كه‌دا باس له‌وه‌شكراوه كه بۆردومانه‌كه ته‌نها زیانی ماددی هه‌بووه و جه‌خت له‌وه‌كراوه‌ته‌وه كه سیستمی به‌رگریی ئاسمانیی سووریا، مووشه‌كه‌كانی ئیسرائیل-ی خستووه‌ته‌خواره‌وه.
تا ئێستاش ئیسرائیل هیچ روونكردنه‌وه‌یه‌كی ده‌رباره‌ی ئه‌م بابه‌ته بڵاونه‌كردووه‌ته‌وه.
له شاری دیمه‌شق له پاڵ هێزه‌كانی رژێمی به‌شار ئه‌سه‌د، چه‌ندین گرووپی میلیشیا ئێرانییه‌كان هه‌ن و ناوبه‌ناو ئیسرائیل به پاساوی میلیشیا ئێرانییه‌كان بۆردومانی دیمه‌شق و ده‌ورووبه‌ری ده‌كات.
کۆمێنت (0)
تا ئێستا هیچ کۆمێنتێک نەکراوە.