سەرۆکی هەرێمی کوردستان بۆ کۆچی دوایی دڵزاری شاعیر په‌یامێكی سه‌ره‌خۆشی بڵاوكرده‌وه، رایگه‌یاند: دڵزاری گەورە شاعیر، لە هەردوو مەیدانی ئەدەب و تێکۆشانی سیاسیدا، نموونەی بەخشش و هەڵوێست و کۆڵنەدان بوو.
ئه‌مه ده‌قه‌كه‌یه‌تی:
بە داخەوە هەواڵی کۆچی دواییی شاعیری گەورە و تێکۆشەری دیاری گەلەکەمان ئەحمەد دڵزارم پێگه‌یشت.
دڵزاری گەورە شاعیر، لە هەردوو مەیدانی ئەدەب و تێکۆشانی سیاسیدا، نموونەی بەخشش و هەڵوێست و کۆڵنەدان بوو، هەموو تەمەنی خۆی لە خزمەتی گەلەکەی و بیروباوەڕەکەیدا تەرخان کرد و لەسەر ئاستی کوردستان و بزووتنەوەی نیشتمانیی عێراقیشدا، ناوێکی درەوشاوە بوو. بە بەرهەمە بەپێز و شیعرە جوانه‌کانی هەر به زیندوویی له یادماندا دەمێنێته‌وه.
پرسە و سەرەخۆشی لە کەسوکار و دۆست و هاوخەبات و هاوڕێیانی و لە سەرجەم نووسه‌ران و ڕۆشنبیرانی کوردستان دەکەم و هاوبەشی خەمیانم.
خوای مەزن سەبووری و ئارامی بە هەموو لایەک ببەخشێت و گیانی خوالێخۆشبوو به بەزەیی و میهرەبانیی خۆی شاد بکات.
نێچیرڤان بارزانی
سەرۆکی هەرێمی کوردستان
2021/4/10
کۆمێنت (0)
تا ئێستا هیچ کۆمێنتێک نەکراوە.