سه‌رۆكایه‌تیى هه‌رێمى كوردستان ئیدانه‌ی ئه‌و هێرشه تیرۆرستیانه ده‌كات كه ئه‌مشه‌و كرانه سه‌ر فڕۆكه‌خانه‌‌ى نێوده‌وڵه‌تیى هه‌ولێر و پێگه‌یه‌كى هێزەکانی توركیا له باشیك.
ڕاگه‌یه‌نراوێك له سه‌رۆكایه‌تیى هه‌رێمى كوردستانه‌وه
زۆر به توندى سه‌ركۆنه‌ى ئه‌و هێرشه تیرۆرستیانه ده‌كه‌ین كه ئه‌مشه‌و كرانه سه‌ر فڕۆكه‌خانه‌‌ى نێوده‌وڵه‌تیى هه‌ولێر و پێگه‌یه‌كى هێزەکانی توركیا له باشیك. هیچ پاساوێك بۆ ئه‌م هێرشانه نییه و له زیان و تێكدانى سه‌قامگیرى و ئاڵۆزكردنى زیاترى دۆخى عێراق، هیچى دیكه‌ى لێناكه‌وێته‌وه به ته‌واوى دژى به‌رژه‌وه‌ندییه‌كانى وڵاته.
چه‌ندباره‌بوونه‌وه‌ى ئه‌م هێرشانه هه‌ڵوه‌سته‌یه‌كى جددى ده‌وێت و ده‌بێ هه‌رێمى كوردستان و حكوومه‌تى فیدراڵى عیراق به پشتیوانیى هاوپه‌یمانیى نێوده‌وڵه‌تى، هه‌ماهه‌نگى و هاریكاریى نێوانیان بۆ به‌ره‌نگاربوونه‌وه‌ى ئه‌و گرووپ و تاقمانه‌ى له پشت ئه‌م هێرشانه‌وه‌ن زیاتر بكه‌ن و سنوورێكى یه‌كجارییان بۆ دابنرێت تا چیتر ئارامى و سه‌قامگیریى وڵات نه‌خه‌نه مه‌ترسییه‌وه و دۆخه‌كه ئاڵۆزتر نه‌بێت.
سه‌رۆكایه‌تیى هه‌رێمى كوردستان
2021/4/14
کۆمێنت (0)
تا ئێستا هیچ کۆمێنتێک نەکراوە.