ساسان عەونی، وەزیری شارەوانی و گەشتوگوزار بەدواداچوون بۆ ڕەوشی خزمەتگوزاری لە سنووری پارێزگای دهۆك دەكات و دامودەزگەكانی سەر بە وەزارەتی شارەوانی و گەشتوگوزاریش رادەسپێرێت بۆ جێبەجێكردنی پرۆژەی خزمەتگوزاری و كەمكردنەوەی رۆتێن و كاركردن بە یەك تیم لەپێناو پەرەپێدانی تەواوی سێكتەرەكانی خزمەتگوزاریی ئاو و ئاوەڕۆ و زیادكردنی ڕێژەی سەوزایی و پەرەپێدانی گەشتوگوزار و شوێنەوار.
نیوەڕۆی ئەمڕۆ (دووشممە 26ی نیسانی 2021) لە دیوانی وەزارەت، ساسان عەونی وەزیری شارەوانی و گەشتوگوزار لەگەڵ سەرۆكی شارەوانیی دهۆك و بەرێوەبەری گشتیی شارەوانییەكانی دهۆك و ژمارەیەكی دیكە لە بەڕێوەبەرانی شارەوانی و ئاو و ئاوەڕۆ و گەشتوگوزار و شوێنەوار، بەڕێوەبەری نەخشەدانانی ئاوەدانی و سەرۆكی شارەوانی و فەرمانگەكانی سەر بە وەزارەت لە سنووری پارێزگەی دهۆك، كۆبووەوە.
لە كۆبوونەوەكەدا ساسان عەونی وەزیری شارەوانی و گەشتوگوزار بەدواداچوونی بۆ ڕەوشی خزمەتگوزاری لە سنووری پارێزگای دهۆك لە تەواوی سێكتەرەكان كرد و جەختی لەسەر جێبەجێكردنی پرۆژەی خزمەتگوزاریی شارەوانی و ئاو و ئاوەڕۆ و گەشتوگوزار و شوێنەوار و زیادكردنی رێژەی سەوزایی و چاكسازی و كاركردنی یەك تیمی بۆ خزمەتكردنی هاووڵاتییانی پارێزگای دهۆك، كردەوە، هەروەها وەزیری شارەوانی و گەشتوگوزار تەواوی فەرمانگەكانی ڕاسپارد بۆ ئەوەی بە جێبەجێكردنی پرۆژە هەمەجۆرەكان، ڕەوشی خزمەتگوزاری لە تەواوی سێكتەرەكان بەرز بكەنەوە.
کۆمێنت (0)
تا ئێستا هیچ کۆمێنتێک نەکراوە.