به‌هۆی شه‌ڕی په‌که‌که‌ و سوپای تورکیا گوندی چه‌ڵکا نه‌سارا له‌ ده‌ڤه‌ری به‌رواری باڵا چۆڵ کرا

ب سه‌ده‌ما هه‌بوونا چه‌كدارێن په‌كه‌كه‌ فرۆكه‌یێن جه‌نگی یێن توركیا به‌رده‌وامن د مۆمبه‌بارانكرنا ده‌ڤه‌رێن سنوری یێن هه‌رێما كوردستانێ و هه‌تا نوكه‌ ژی نیزیكی سه‌د و بیست و گوندان هاتنه‌ چۆلكرن داوی گوند ژی ئه‌ڤرۆ گوندێ چه‌ڵكا نه‌ساران ل ده‌ڤه‌را به‌رواری یا بالا هاته‌ چۆلكرن.  

سه‌ربه‌ست سه‌بری رێڤه‌به‌رێ ناحیا كانێ ماسێ بۆ كوردستان تیڤی راگه‌هاند كو ئه‌ڤرۆ ب سه‌ده‌ما شه‌ر و ئالۆزیێن ناڤبه‌را په‌كه‌كه‌ و سوپایێ توركیا ل ده‌ڤه‌رێن سنوری یێن هه‌رێما كوردستانێ ب تایبه‌ت ل وان گوندێن دكه‌ڤنه‌ دبن زنارا كێسته‌، ئه‌ڤرۆ گوندێ چه‌لكا نه‌سارا هاته‌ چۆلكرن.

لگۆری رێڤه‌به‌رێ ناحیا كانی ماسێ هه‌ژده‌ مال ل ڤی گوندی ژیانا خوه‌ برێڤه‌ دبرن، ئاماژه‌ ب وێ ئێكێ ژی كر كو ب ڤی گوندی هه‌تا نها ژبه‌ر شه‌رێ ڤێ دوماهیێ یێ په‌كه‌كه‌ و سوپایێ توركیا ئه‌ڤه‌ چوارده‌مین گونده‌ پشتی گوندێ كێسته‌ دهێته‌ چۆل كرن ژ ترسێ په‌كه‌كه‌.

رێڤه‌به‌رێ ناحیا كانی ماسێ هه‌روه‌سا دیار كر كو زیانه‌كا ماددی یا مه‌زن گه‌هشتیه‌ وان گوندان ب تایبه‌ت ژ لایێ چاندنی و ئاژه‌لداریێ ڤه‌ و داخاز ژ په‌كه‌كه‌ ژی كر كو ناڤچه‌یا وان چۆل بكه‌ن و شه‌رێ خوه‌ ببن ناڤ خاكا توركیا، رۆژا پێنجشه‌مبیێ ئیسحان چه‌له‌بی رێڤه‌به‌رێ ناحیا سیده‌كان د داخویانیه‌كێ تایبه‌ت دا ژبۆ كوردستان تیڤی ئه‌شكه‌ره‌ كر كو ژبه‌ر شه‌رێ په‌كه‌كه‌ و سوپایێ توركیا سه‌د هه‌ژده‌ گوند ل وێ ناحیێ ڤالا بوونه‌.