ئه‌ندامێكی ئه‌نجوومه‌نی نوێنه‌رانی عێراق رایگه‌یاند، دوای جه‌ژن حكوومه‌تی فیدڕاڵ به‌شه بودجه‌ی هه‌رێمی كوردستان له بودجه‌ی ساڵی دووهه‌زار و بیست و یه‌ك ده‌نێرێت.
شێروان دووبه‌ردانی ئه‌ندامی ئه‌نجوومه‌نی نوێنه‌رانی عێراق بۆ شه‌فه‌ق نیوز رایگه‌یاند: لیژنه ته‌كنیكییه هاوبه‌شه‌ی كه بۆ به‌داداچوون بۆ به‌نده‌كانی ڕێككه‌وتن له نێوان حكوومه‌تی فیدڕاڵ و حكوومه‌تی هه‌رێمی كوردستان پێكهێندراوه، به‌رده‌وامه له‌سه‌ر كاره‌كانی بۆ جێبه‌جێكردنی ڕێككه‌وتنه‌كه و ئه‌وه‌ی كه له بودجه‌دا هاتووه، دووبه‌ردانی ئاماژه‌ی به‌وه‌شدا كه دوای پشووی جه‌ژن، حكوومه‌تی فیدڕاڵ مووچه‌ی فه‌رمانبه‌ران و به‌شه بودجه‌ی هه‌رێمی كوردستان له بودجه‌ی دووهه‌زارو بیست و یه‌ك ده‌نێرێت.
وه‌ك سه‌رچاوه‌كه ئاماژه‌ی پێكردووه، شێروان دووبه‌ردانی ئه‌وه‌شی روونكردۆته‌وه كه ناردنی به‌شه بودجه‌ی هه‌رێمی كوردستان به یه‌كجار یان به چه‌ند قۆناغێك له نێوان لیژنه‌ی ته‌كنیكی و وه‌زاره‌تی دارایی حكوومه‌تی فیدڕاڵ دایه.
جێگه‌ی باسه مسته‌فا كازمی سه‌رۆك وه‌زیرانی عێراق له نۆی ئه‌م مانگه له كۆنگره‌یه‌كی رۆژنامه‌وانیدا رایگه‌یاند: ئێستا یه‌كلایكردنه‌وه و ناردنی به‌شه بودجه‌ی هه‌رێمی كوردستان له قۆناغی كۆتاییدایه.
کۆمێنت (0)
تا ئێستا هیچ کۆمێنتێک نەکراوە.