شه‌ڕ و ئاڵۆزییه‌كانی نێوان چه‌كدارانی په‌كه‌كه و سوپای توركیا زیانی زۆری به به‌رهه‌می كشتوكاڵ له ناوچه سنوورییه‌كان گه‌یاندووه.
هه‌ر له‌و چوارچێوه‌یه‌شدا ئه‌مرۆ فڕۆكه جه‌نگییه‌كانی توركیا دوو جار بنكه و باره‌گاكانی په‌كه‌كه‌یان له چیای مه‌تینای سه‌ر به قه‌زای ئامێدی بۆردومانكرد.
په‌یامنێری كوردستان تیڤی له ئامێدی رایگه‌یاند: نیوه‌ڕۆی ئه‌مرۆ شه‌ممه فڕۆكه جه‌نگییه‌كانی توركیا دوو جار بنكه و باره‌گاكانی په‌كه‌كه‌یان له زنجیره چیای مه‌تینا بۆردومان كردووه، ئاماژه‌ی به‌وه‌ش كرد، تا ئێستا زه‌ره‌ر و زیانه‌كانی ئه‌و بۆردومانه دیار نییه.
شه‌وی رابردووش فڕۆكه جه‌نگییه‌كانی توركیا ده‌ڤه‌ری به‌رواری باڵای سه‌ر به ناحیه‌ی كانی ماسێیان بۆردومانكرد و به پێی زانیارییه‌كانی كوردستان تیڤی فڕۆكه‌ی جه‌نگی و هه‌لیكۆپته‌ری سه‌ربازی توركیا سه‌رێ حه‌مێیان له نێوان گوندی هرورێ و كۆمه‌ڵگای بریفكا بۆردومانكردووه.
شایه‌نی باسه شه‌ڕ و ئاڵۆزییه‌كانی نێوان چه‌كدارانی په‌كه‌كه و سوپای توركیا زیانی زۆری به به‌رهه‌می كشتوكاڵ له ناوچه سنوورییه‌كان گه‌یاندووه، به تایبه‌تیش له‌و گوندانه‌ی كه چۆڵكراون.
جوتیارانی ئه‌و ناوچانه‌ش داوا ده‌كه‌ن له مافی سرووشتی خۆیان به‌هره‌مه‌ند بن و بتوانن كاری كشتوكاڵ له‌سه‌ر زه‌ویه‌كانیان بكه‌ن و خوازیاریشن ئه‌و شه‌ڕ و ئاڵۆزییه له ناوچه‌كانی ئه‌وان دوربخرێته‌وه.
کۆمێنت (0)
تا ئێستا هیچ کۆمێنتێک نەکراوە.