ئه‌مڕۆ یه‌ك شه‌ممه 30 ساڵ به‌سه‌ر كۆچی دوای هونه‌رمه‌ندی گه‌وره‌ی گه‌له‌كه‌مان حوسێن عه‌لی تێپه‌ڕ ئه‌بێت. 
ناوی ته‌واوی حوسێن عه‌لی زه‌ند- ه، له‌ساڵی 1925 له گوندی حه‌فته‌غاری سه‌ر به‌قه‌زای داقوق له‌دایك بووه، له ناو خه‌ڵكیشدا به حوسێن عه‌لی گورجی ناسراوه و دایكی ناوی ئامینه كه‌ریم زه‌نگه‌نه‌یه.
هونه‌رمه‌ند هه‌ر له كاتی لاوێتییه‌وه شه‌یدای هونه‌رو گۆرانی و مه‌قامی كوردی بووه، حوسێن عه‌لی هه‌ر له منداڵییه‌وه گوێی به ده‌نگی شمشاڵ و دووزه‌له‌ی شوان و قه‌تار و ئه‌ڵاوه‌یسی و ئای ئای جوتیارانی گونده‌كه زرنگاوه‌ته‌وه.
حوسێن عه‌لی له ساڵی 1948 چووه‌ته ئێزگه‌ی كوردی له به‌غدا و له‌وێ چه‌ند گۆرانییه‌كی وتووه و یه‌كه‌م گۆرانیشی (قومری سه‌رباڵم شینه) بووه.
هونه‌رمه‌ند شاره‌زاییه‌كی زۆری هه‌بووه له زۆربه‌ی مه‌قامه‌كانی كوردی، دواتر له رێگه‌ی قه‌وانه‌وه ئاشنای ده‌نگی عه‌لی مه‌ردان و عه‌بدوڵڵای سه‌عید كه‌ركوكی و ده‌یان گۆرانیبێژی ئه‌و سه‌رده‌مه بووه.
هه‌روه‌ها له ئه‌رشیفی هونه‌رمه‌ند دا چه‌ند گۆرانییه‌ك ریكۆرد كراوه كه له دانیشتنێكدا له‌گه‌ڵ مامۆستا عه‌لی مه‌ردان و سه‌عیدی عه‌بدوڵڵا كه‌ركوكی وتراون، ئیستا له‌لای شه‌یدایانی ده‌نگی هونه‌رمه‌ند پارێزراون.
حوسێن عه‌لی دۆستایه‌تییه‌كی پته‌وی له‌گه‌ڵ هونه‌رمه‌ندی خوالێخۆشبووان سه‌ڵاح داوده و ره‌سوڵ گه‌ردی و تایه‌ر تۆفیق و حه‌سه‌ن زیره‌ك هه‌بوو .
هونه‌رمه‌ند له ساڵی 1971 له پاش به‌شداریكردنی له ئاهه‌نگێك له خانه‌قین له‌لایه‌ن رژێمی به‌عسه‌وه به‌ندكراوه و ئه‌شكه‌نجه‌یه‌كی زۆر دراوه، به‌ڵام به‌وه‌ش هه‌ر كۆڵی نه‌داوه و به‌رده‌وام بووه له گۆرانی و مه‌قام وتن.
حوسێن عه‌لی له1991/7/18 له شاری به‌غدا گیانی سپارد و له ژیانی هونه‌رمه‌ندایه‌تی و گۆرانی و مه‌قام وتن به‌یه‌كجاری دابڕا و ته‌رمه‌كه‌ی له گۆڕستانی شێخ مه‌عروف به‌خاك سپێردرا.
ئا- كامران
کۆمێنت (0)
تا ئێستا هیچ کۆمێنتێک نەکراوە.