به‌رپرسی لقی 3ی پارتی دیموكراتی كوردستان رایگه‌یاند: هۆكاری ئاسایی نه‌كردنه‌وه‌ی بارودۆخی كه‌ركووك بۆ كه‌مته‌رخه‌می حكومه‌ته یه‌ك به‌دوایه‌كه‌كانی به‌غدا ده‌گه‌ڕێته‌وه.
له‌میانه‌ی به‌شداریكردن له به‌رنامه‌ی رۆژه‌ڤی كوردستان تیڤی سه‌باره‌ت به پرۆسه‌ی سیاسی عێراق و پرۆسه‌ی هه‌ڵبژاردنی پێشوه‌خته دكتۆر محه‌مه‌د خورشید به‌رپرسی لقی 3ی پارتی دیموكراتی كوردستان رایگه‌یاند: پرسی هه‌ڵبژاردن، پرسێكه ده‌بێت ئه‌نجام بدرێت، به‌ڵام به پێی لێكدانه‌وه‌كان ، ته‌نها حزبه گه‌وره‌كان ده‌توانن كورسی به ده‌ست بێنن .
ئاماژه‌ی به‌وه‌شكرد ئه‌وه‌ی ره‌وتی سه‌در كردوویه‌تی ، به فه‌رمی نه‌دراوه‌ته كۆمسیۆن ، به‌وه‌ی كشاوه‌ته‌وه له پرۆسه‌ی هه‌ڵبژاردن . هه‌ڵبژاردنه‌كان ئه‌نجام ده‌درێت به هه‌ر شێوه‌یه‌ك بۆیه ، به هه‌ر شێوازێك بێت پێویسته كورد خۆی بۆ ئاماده بكات . بایكۆت كردن له هه‌ڵبژاردنه‌كان كارێكی باش نییه ، نابێت كورد بیر له بایكۆت كردن بكاته‌وه .
سه‌باره‌ت به كورد له كه‌ركووك دكتۆر محه‌مه‌د خورشید رایگه‌یاند: هه‌وڵ ده‌ده‌ین كه 6 كورسی به ده‌ست بێنیین له گه‌ڵ لایه‌نه‌كانی دیكه . هۆكاری ئاسایی نه‌كردنه‌وه‌ی بارودۆخی كه‌ركووك بۆ كه‌مته‌رخه‌می حكومه‌ته یه‌ك به‌دوایه‌كه‌كانی به‌غدا ده‌گه‌ڕێته‌وه . سه‌باره‌ت به ره‌وشی كوردستان له سه‌ر پرسی كشانه‌وه‌ی ئه‌مه‌ریكا ، ئه‌وا زیانی ده‌بێت له سه‌ر عێراق و به هه‌رێمی كوردستانه‌وه ، ته‌نها شتێك هه‌یه كه هه‌ڕێم پارێزراو بێت ئه‌ویش یه‌كڕیزی ماڵی كورد و پرۆسه‌ی چاكسازییه كه چیتر پشت به به‌غدا نه‌به‌ستین
دكتۆر محه‌مه‌د خورشید گوتیشی: ئه‌و رووداوه‌ی مه‌خموور بۆ رفاندنی ژماره‌یه‌ك له هاووڵاتی ، ئه‌وه ده‌سه‌لمێنێت كه چالاكی تیرۆریستان زیادی كردووه وه‌ك ده‌بینین له چالاكی تری ئه‌و گروپه تیرۆریستییانه له په‌ككه‌وتنی كاره‌باو زیان گه‌یاندن به دامه‌زراوه فه‌رمییه‌كان ، ئه‌وه زه‌نگێكی مه‌ترسیداره بۆ سه‌ر پرۆسه‌ی سیاسی عێراق . هه‌ر كارێكی تێكده‌رانه به تیرۆر ناوده‌بردرێت ، له عێراق به روونی ئه‌و بابه‌ته ئاشكرایه .
هه‌ر هێزێك له مه‌رامی سیاسی تاوان ئه‌نجام بده‌ن ئه‌وا به تیرۆر له قه‌ڵه‌م ده‌درێت به‌داخه‌وه له میدیاكان و سۆشیال میدیاكان باس ده‌كرێت، به‌ڵام راستیه‌ك هه‌یه گفتوگۆكان له نێوان حكومه‌تی هه‌رێمی كوردستان و حكومه‌تی عێراقی به‌رده‌وامی هه‌یه، به‌ڵام زۆر له‌خاڵه‌كان له لایه‌ن حكومه‌تی عێراقه‌وه جێبه‌جێ ناكرێت ئه‌وه‌ش بۆ لاوازی ئه‌و حكومه‌ته ده‌گه‌رێته‌وه .
دارشتنی : سوهێل تاهیر عه‌بدولڵا
کۆمێنت (0)
تا ئێستا هیچ کۆمێنتێک نەکراوە.