لەچوارچێوەی هەوڵەكانی بۆ برەودان بە بواری پێشبینیكردنی كەش و هەواو ئاگاداربوونی پێشوەختە لە هەڕەشەكانی، بەڕێوەبەرایەتی گشتی كەشناسیی لە (مەغریب) كۆمپیوتەرێكی زەبەلاحی تەرخانكردووەو ناوی ناوە (ئەمتاڕ – AMTAR) و دوای پێكەوە بەستانی تەواوی بەشەكانی و ئەنجامدانی چەندین تاقیكردنەوە لە مانگی نیسانی رابردووەوە، بەڕێوەبەرایەتییەكە بە فەڕمی كۆمپیوتەرە ناوازەكەی بەگڕخست.
لەمبارەیەوە، (حوسێن یوعابد) ی بەرپرسی بەشی پەیوەندییەكانی بەڕێوەبەرایەتی گشتی كەشناسیی لە (مەغریب) رایگەیاند:"ئەو كۆمپیوتەرە پێشكەوتووە پشت دەبەستێ بەو داتایانەی كە بەردەوام پێی دەدرێت لەبارەی توخمەكانی كەش و هەواو پاشان لەسەر بنەمای ئەو داتایانەوە، پێشبینی خۆی لەسەر شێوەی مۆدێلی پێشكەوتووی نەخشەی كەش و ئاوو هەوایی پێشكەش دەكات، بەمەش تواناكانی پسپۆڕانی بەشی پێشبینیمان زۆر زیاترو فراوانترو وردتر دەكات لەبارەی پێشبینیكردنی دیاردەكانی كەش و ئاوو هەوا بە گشتی، بە تایبەتیش دیاردە مەترسیدارەكان و هەروەها چاكتركردنی وردەكاریی جوگرافیی بۆ شوێنی مەبەست لەسەر ئاستی نێوخۆیی وڵاتەكەمان، بەمەش دەتوانین بەشێوەیەكی زۆر باشتر لە جاران درك بە مەترسییەكانی كەش و هەوای ناوچەكەمان بكەین، چونكە لە كۆتاییدا ئەو كۆمپیوتەرە مامەڵە لەگەڵ مۆدێلی زۆر پێشكەوتووی لێكۆڵینەوەكانی جیهانیی دەكات كە لەسەر ئاستی مەغریبدا سوودێكی یەگجار زۆری دەبێت لەسەر بوارە جیاجیاكانی وەك ئابووری و كۆمەڵایەتی".
لەلایەكی دیكەوە، (سەعید شوكری) پسپۆڕ لە بوارەكانی ژینگەو گۆڕانە ئاو و هەواییەكان، دەربارەی ئەم ئامێرە پێشكەوتووەی كەشناسیی لە (مەغریب) دەڵێ:"راستە ئێمە ناتوانین رێگە لەو دیاردە كەش و هەواییە مەترسیدارانە بگرین، بەڵام لە رێگەی ئامێرو سیستەمێكی ئاوا پێشكەوتوودا لایەنی كەم دەتوانین پێشبینییەكی زۆر پێشكەوتوو بۆ ئەو دیاردانە بكەین تاوەكو پێشوەختە خۆمان و دەزگا پەیوەندیدارەكان لە ئامادەباشیدا بین لە پێناو كەمتر كردنەوەی زەرەرو زیانە گیانی و مادییەكان".
ژێدهر - كهشناسی ههرێم
مەغریب کۆمپیوتەرێکی گەورەی بۆ پێشبینییەکانی کەش و هەوا بەگڕخست
100%
کۆمێنت (0)
تا ئێستا هیچ کۆمێنتێک نەکراوە.