گوتەبێژی وەزارەتی دەرەوەی ئێران ڕایگەیاند، لە کۆتایی مانگی ئەیلوولەوە هیچ گفتوگۆیەک لەنێوان وڵاتەکەیی و سعوودیە ئەنجام نەدراوه و هه‌روه‌ها مه‌رجی گفتوگۆکردن لەگەڵ ئه‌و وڵاته دەخاتەڕوو.
سەعید خەتیبزادە گوتەبێژی وەزارەتی دەرەوەی ئێران لە کۆنفرانسی هەفتانەی خۆی لە تاران گوتی "پەیوەندیی نێوان ئێران و سعوودیە پچڕاوە، ئەگەر سعوودیە ویستێکی جددی نیشان بدات پەیوەندییەکانی نێوان تاران و ڕیاز بەرەوپێش دەچێت، هەروەها خولێکی دیکەی گفتوگۆکانمان بەڕێوە دەچێت.
هەروەها لە بەشێکی دیکەی گوتارەکەیدا سەبارەت بە کێشەكانی نێوان سعوودیە و لوبنان قسەی کرد و گوتی: گفتوگۆی نێوان ئێران و سعوودیە دوو قۆڵین، ئێمە لەمبارەوە لەگەڵ دۆسته‌كانمان و لایەنی سێیەم قسەمان نەکردووە.
ئاماژەی بەوەش کرد کە سیاسەتی هەڵوەشاندنەوەی پەیوەندییە دیبلۆماسییەکان و لۆژیکی گەمارۆ و فشارەکان لەگەڵ لوبنان کار ناکات. هەروەها گوتیشی، باشتروایە کێشەکان دوو قۆڵی لەنێوان خۆیاندا چارەسەر بکەن.
جێی باسە گفتوگۆکانی نێوان ئێران و سعوودیە لە مانگی نیسان لە بەغدا دەستی پێ کرد، دوای ئەوەی هەوڵەکانی حکوومەتی عێراق بۆ کۆکردنەوەی هەردوولا لەسەر یەک مێز سەرکەوتوو بوو، تاران و ڕیاز تا ئێستا چوارجار بەیەکەوە گفتوگۆیان کردووە، کە سێیان لە سەردەمی حکوومەتەکانی پێشووی ئێران بوون و تەنیا چوارەمیان لە سەردەمی ئیبراهیم ڕەئیسی سەرۆککۆماری ئێستای ئێران بووە.
کۆمێنت (0)
تا ئێستا هیچ کۆمێنتێک نەکراوە.