ئه‌نگێلا مێركڵ، ڕاوێژكاری ئه‌ڵمانیا له په‌یوه‌ندییه‌كی ته‌له‌فۆنیدا به ڤلادمێر پوتن-ی سه‌رۆكی ڕووسیا راگه‌یاندووه كه ئه‌و كاره‌ی بێلاڕووس ده‌یكات بۆ به‌كارهێنانی كۆچبه‌ران، كارێكی نامرۆڤانه‌یه و مایه‌ی قبوڵكردن نییه.
هه‌روه‌ها ئه‌نگێلا مێركڵ داواشی له پوتن كردووه فشار بخاته سه‌ر حكومه‌تی بێلارووس بۆ چاره‌سه‌ركردنی ئه‌م بابه‌ته.
یه‌كێتی ئه‌وروپا و هاوپه‌یمانێتی ناتۆ ئالیكسانده‌ر لوكاشینكۆی سه‌رۆكی بێلاڕووس تۆمه‌تبار ده‌كه‌ن به‌وه‌ی كۆچبه‌ران وه‌كو چه‌كێك به‌كارده‌هێنێت بۆ فشار كردنه سه‌ر ڕۆژئاوا، ئه‌وه‌ش له‌ڕێی ڕه‌وانه‌كردنی هاوڵاتیانی وڵاتانی ڕۆژهه‌ڵاتی ناوه‌ڕاسته‌وه بۆ مینسكی پایته‌خت و دواتریش بۆ سنووره‌كانی وڵاته‌كه له‌گه‌ڵ پۆڵه‌ندا و وڵاتانی به‌ڵتیكدا.
هه‌روه‌ها پۆڵه‌ندا و وڵاتانی دیكه‌ی یه‌كێتی ئه‌وروپا بێلاڕووسیان تۆمه‌تبار كردووه به‌وه‌ی هانی كۆچبه‌رانی ڕۆژهه‌ڵاتی ناوه‌ڕاست و ئه‌فغانستان و ئه‌فریقا ده‌دات به‌شێوه‌یه‌كی نایاسایی له بێلاڕووسه‌وه بپه‌ڕنه‌وه بۆ ئه‌وروپا.
ژێده‌ر / ده‌نگی ئه‌مریكا
کۆمێنت (0)
تا ئێستا هیچ کۆمێنتێک نەکراوە.