له كاتی نوێژی هه‌ینیدا ئه‌مڕۆ ته‌قینه‌وه‌یه‌ك له مزگه‌وتێكی ئه‌فغانستان ڕوویداوه و به‌هۆیه‌وه كوژراو و بریندار هه‌یه.
ئاژانسی ده‌نگوباسی (ڕۆیته‌رز) بڵاوی كرده‌وه: ته‌قینه‌وه‌كه له مزگه‌وتێكی هه‌رێمی ننجه‌رهار له باكوری ئه‌فغانستان ڕوویداوه و به‌گوێره‌ی زانیارییه سه‌ره‌تاییه‌كانیش به‌لایه‌نی كه‌م 12 كه‌س گیانیان له‌ده‌ستداوه و به ده‌یانی تریش برینداربوون.
ئاژانسه‌كه ئاشكراشی كرد كه ته‌قینه‌وه‌كه كاتژمێر 1:30ی ئه‌مڕۆ هه‌ینی له كاتی نوێژدا ڕوویداوه و پێده‌چێ ته‌قه‌مه‌نییه‌كان هه‌ر له‌نێو مزگه‌وت دانرابن.
جێی باسه دوای گه‌ڕانه‌وه‌ی بزووتنه‌وه‌ی تاڵیبان بۆ سه‌ر ده‌سه‌ڵاتی ئه‌فغانستان ئه‌مه چه‌ندان ته‌قینه‌وه‌یه له ڕۆژانی هه‌ینی و له‌كاتی نوێژدا له مزگه‌وته‌كان ڕووبده‌ن كه به‌هۆیه‌وه سه‌دان هاووڵاتی سڤیل بوونه‌ته قوربانی، هه‌ندێ له ته‌قینه‌وه‌كانیش ڕێكخراوی تیرۆریستی داعش به‌رپرسیاره‌تی ئه‌نجامدانی گرتۆته ئه‌ستۆ.
کۆمێنت (0)
تا ئێستا هیچ کۆمێنتێک نەکراوە.