گوهدار شێخۆ: مه‌سرور بارزانی ڕەزامەندی ل سەر پرۆژێن ساخلەمیێ ل ئیدارا سەربەخۆ یا زاخۆ کر

سەرپەرشتێ ئیدارا سەربەخۆ یا زاخۆ ئاشکرا کر کو سەرۆکێ حکومەتا هەرێما کوردستانێ ب کۆژمێ ملیارەک و 668 ملیۆن دیناران ڕەزامەندیا خوە ل سەر بجهئینانا هژمارەکا پرۆژێن ساخلەمیێ ل سنوورێ ئیدارا سەربەخۆ یا زاخۆ دیار کر.
گوهدار شێخۆ، سەرپەرشتێ ئیدارا سەربەخۆ یا زاخۆ بۆ ماڵپەرێ فەرمیێ پارتی دیموکراتی کوردستان ئاشکرا کر کو پشتی چەندین کۆمبوون دگەل کەرتێ ساخلەمیێ ل ئیدارا سەربەخۆ یا زاخۆ هاتینە ئەنجامدان ل سەر راسپاردا سەرۆکێ حکومەتا هەرێما کوردستانێ وەزیرێ ساخلەمیێ ل حکومەتا هەرێمێ سەرەدانا ئیدارا ناڤهاتی کر و بڕیار هاتەدان هەمی پێدڤیێن کەرتێ ساخلەمیێ بهێنە دابینکرن.
ناڤهاتی ئاماژە دا وێ چەندێ کو ژوان پرۆژێن سەرۆکێ حکومەتا هەرێما کوردستانێ ڕەزامەندی ل سەر کری دابینکرنا بۆدجەیا هەیڤانە ب کوژمێ 100 ملیۆن دیناران بۆ ساخلەمیا زاخۆ، هەروەسا نووژەنکرنا نەخوەشخانا گشتی یا بێدارێ ل زاخۆ و دابینکرنا کەل و پەلێن پێدڤی ب کوژمێ 252 ملیۆن دیناران، هەر د چارچۆڤێ وان پرۆژان دا یێن کو ڕازەمەندی ل سەر هاتیەکرن نەخۆشخانا هەوارهاتنێ ل زاخۆ دێ ب کوژمێ 266 ملیۆن دیناران هێتە نووژەنکرن و کەلوپەلێن پێدڤی ژی دێ بۆ هێنە دابینکرن، سەرەرایی ڤێ چەندێ نەخۆشخانا زارۆکبوونێ ژی ل زاخۆ ب کوژمێ 238 ملیۆن دیناران دێ هێتە نووژەنکرن و کەلوپەلێن پێدڤی دێ بۆ وێژی هێنە دابینکرن.
سەرپەرشتێ ئیدارا سەربەخۆ یا زاخۆ خویا کر کو د هەمان دەم دا دێ بنگەهێن ساخلەمیێ (دەلال، خابوور، بارزان، تلکەبەر، سەعید پیران) ژی ب کوژمێ 500 ملیۆن دیناران ل زاخۆ هێنە نووژەنکرن و کەلوپەلێن پێدڤی دێ بۆ هێنە دابینکرن، هەروەسا ژ سەرجەمێ وی پارێ هاتیە تەرخانکرن ب کوژمێ 50 ملیۆن دیناران دێ رێڤەبەریا گشتی یا ساخلەمیێ ل زاخۆ هێتە نووژەنکرن، زێدەباری ڤێ چەندێ دێ بنگەهێ بارزان یێ ساخلەمیێ ل زاخۆ ب کوژمێ 58 ملیۆن دیناران هێتە نووژەنکرن و کەلوپەلێن پێدڤی دێ بۆ هێنە دابینکرن، هەروەسا سیستەمێ ئەتی و کامیرە دێ بۆ هەمی نەخۆشخانێن زاخۆ ب کۆژمێ 204 ملیۆن دیناران هێتە دانان و گۆت: د چارچۆڤێ وان پرۆژان دا ترۆمبێلێن تەزاندنێ بۆ دەرمانان و شەش ترۆمبێلێن هەوارهاتنێ دێ هێنە دابینکرن، هەروەسا بسپۆرێن پێدڤی ژی د کەرتێ ساخلەمیا زاخۆ دا دێ هێنە پرکرن.