ئەمڕۆ دووشەممە 15ی نۆڤێمبەری 2021، بە ئامادەبوونی مەسرور بارزانی سەرۆکی حکومەتی هەرێمی کوردستان، ڕێوڕەسمی هەشتەمین فێستیڤاڵی نێودەوڵەتیی فیلم لە دهۆک دەستی پێکرد کە هەفتەیەک بەردەوام دەبێت.
سهرۆكی حكومهتی ههرێمی كوردستان، لە گوتارێکدا ڕایگەیاند کە به گوێرهی توانا، ههموو پشتیوانییهكی ماددی و مهعنهویی بۆ كاری هونهری دەکەین و پابهندین به پێشخستنی بواری كولتووری و هونهری
سهرۆكی حكومهت ئاماژهی بهوهشدا کە سینهما دهتوانێت رۆڵێكی كاریگهر له پرۆسهی هۆشیاری كۆمهڵگه ببینێت. هەروەها گوتیشی: گهلی كوردستان به درێژایی مێژووی خۆی رووبهڕووی دهیان كارهسات، كۆمهڵكوژی، جینۆساید، سیاسهتی رهگهزپهرستی و لهناوبردن بووهتهوه، له پهنجا ساڵی رابردوودا تاوانی هۆڤیانه دژی گهلی كوردستان ئهنجامدراون، بهڵام بهداخهوه ئهو تاوانانه و مێژووی تراژیدیای گهلی ئێمه وهك ئهوهی پێویسته له سینهمادا رهنگی نهداوهتهوه.
ئەمەش دەقی گوتاری سەرۆکی حکومەتی هەرێمی کوردستانە :
ئەز گەلەک خۆشحالم، ئەڤرۆ ل هەشتەمین فیلمە فەستیڤاڵا نێڤدەولەتی یا دهۆکێ پشکدارم. دەستخۆشیێ ل رێڤەبەر و رێکخەرێن ڤێ فەستیڤاڵێ دکەم کو ئەڤە چەند ساڵن، ب رەنگەکێ سەرکەفتی فەستیڤاڵێ ئەنجام ددەن.
خێرهاتنەکا گەرم ل هەموو مێهڤانێن بەرێز و سینەماکار و فیلمسازان دکەم کو ژ دەرڤەی هەرێما کوردستانێ هاتینە، زۆر ب خێر بهێن.
جهێ خۆشحالیێ یە کو ب رێکا ڤێ فەستیڤاڵێ، سینەماکار و فیلمسازێن کوردستانێ و وەڵاتێن دەوروبەر و جیهانێ ب هەڤڕا دجڤن و هەڤدوو ناس دکەن و دانوستاندنان لسەر بەرهەمێن خۆ و پێشڤەبەرنا سینەمایێ و فیلمسازیێ ب گشتی دکەن. ئەڤ جۆرێ فەستیڤاڵان، دەلیڤەیێن زۆر گرنگن بۆ پێشڤەچوونا هونەرێ سینەمایێ و ل هەمان دەمدا بۆ پتر ناساندنا کوردستانێ.
بێگومان سینەما، هونەرەکێ ئێکجار گرنگ و کاریگەرە، کو دشیان دایە ب رێکا ڤی هونەری، چەندین پەیامێن گرنگ و مرۆڤایەتی بگەهنە خەلکی، هەروەسا سینەما دکاریت رۆلەکێ کاریگەر ژی د پرۆسەیا هشیارکرنەڤە و پێشڤەبرنا جڤاکی دا هەبیت.
گەلێ کوردستانێ، ب درێژاهییا دیروکا خۆ، راستی دەهان کارەسات و کومکوژی و جینۆساید و سیاسەتا رەگەزپەرستیێ و ژناڤبرنێ بوویە. هەر بۆ نموونێ، بتنێ ل پێنجی ساڵێن دەربازبووییدا تاوانێن مەزن و هۆڤایەتی ل دژی گەلێ کوردستانێ هاتینە ئەنجام دان. مخابن ئەڤ تاوانە و دیروکا تراژیدی یا گەلێ کوردستانێ، وەکو پێدڤی د سینەمایێدا رەنگ نەدایەڤە. ل دەمەکی ژ هەژی هندێ نە کو ژ لایێ سینەماکارێن کوردستانی و بیانیڤە، ببنە دەهان فیلمێن کاریگەر و ب هێز. ل هەمان دەمدا، دیرووکا گەلێ کوردستانێ، یا تژییە ژ دەهان داستانێن ئازایەتی و قەهرەمانیێ، هەروەسا چەندین سەرکردە و رێبەر و کەسایەتی و هێمایێن نیشتیمانی و وەڵاتپارێزیێ هەنە کو ژ هەژی وێ چەندێ نە ببنە مژار و بابەتێن سینەمایێ و نڤشێنن نوکە و پاشەرۆژێ، هایداری دیرووکا پڕ روهنا گەلێ کوردستانێ ببن.
هەر وەسا، جوگرافیا و سروشت و خۆزایێ هەرێما کوردستانێ، رەنگە زۆر ب گونجن کو وەکو جهـێن وێنەگرتنا فیلمێن سینەمایی بهێنە بکارهێنان. ژ ڤی ئالیڤە حکومەتا هەرێما کوردستانێ، پێشوازیێ ژ وان هەموو سینەماکاران دکەت بهێن و وێنەیێن خۆ بگرن. ژ بۆ ڤی مەرەمێ ژی، د چارچووڤەیێ رێکار و یاسایێن کار پێ دهیتە کرن، ئەم د ئامادەینە بۆ هەر هەڤکاری و پشتەڤانییەکا فیلمسازان.
حکومەتا هەرێما کوردستانێ پشتەڤانییا خۆ بۆ پێشڤەبرنا بوارێ کەلتووری و رەوشەنبیری ل کوردستانی ب گشتی دووپات دکەتەڤە و ل ساڵێن دەربازبووییدا، حکومەت هەڤکارا بوارێ سینەمایێ بوویە و ب شێوەیێن ماددی و مەعنەوی هاریکاری یا دەهان سینەماکار و پرۆژەیێن هونەری کریە. نوکە ژی ب هەمان رەنگ، ئەم د ئامادەینە ل گۆڕەی شیانێن حکومەتێ، هەماهەنگ و هەڤکار بین. هەر چەندە هوین دئاگەهدارن کو مخابن ل دو ساڵێن دەرباز بوویی، ب ئەگەرێ قەیرانا دارایی، هەرێما کوردستانێ د رەوشەکا زەحمەت یا دارایی دایە، کو هەتا نوکە ژی مە نەشیایە ب تەمامی ژ ئەڤێ رەوشا ب زەحمەت دەرباز ببین. نوکە کارێ بەراهیێ یێ حکومەتێ دابینکرنا مووچەیێ مووچەخۆرێن هەرێما کوردستانێ یە، بەلێ لگەڵ ڤێ چەندێ ژی ئەم کار دکەین بۆ ئاڤاکرنا ژێرخانەیەکا ب هێز یا ئابووری و د هەمان دەمدا ژی پێشڤەبەرنا بوارێ کەلتووری.
جارەکا دی، دەستخۆشیێ ل رێکخەرێن ڤێ فەستیڤاڵێ دکەم و هیڤییا سەرکەفتنێ بۆ سینەماکارێن کوردستانێ دخوازم و ئومێدەوارم ل ئاستێ وێ بەرپرسیاریێ بن یا ل سەر ملێن وان و ب رەنگەکێ بابەتی، رەوش و دوورهێل و دیرووکا گەلێ کوردستانێ ب باشی ب رێکا ئەکرانێن سینەمایێ، بگەهیننە هەموو جیهانێ.
کۆمێنت (0)
تا ئێستا هیچ کۆمێنتێک نەکراوە.