مەسرور بارزانی سەرۆکی حکوومەتی هەرێمی کوردستان نامەیەکی لە لۆید ئۆستن وەزیری بەرگریی ئەمەریکا پێگەیشت.
لە نامەکەدا، وەزیری بەرگریی ئەمەریکا جەخت لە گرینگیی بەردەوامبوونی پەیوەندی بەهێزی نێوان هەرێمی کوردستان و ئەمەریکا و هەماهەنگیی بۆ ڕووبەڕووبوونەوەی تیرۆریستانی داعش دەکاتەوە.
لە بەشێکی نامەکەی وەزیری بەرگریی ئەمەریکا بۆ سەرۆکی حکوومەتی هەرێمی کوردستان هاتووە ”سوپاسی ڕۆڵی گرینگیی پێشمەرگە لە تێکشکاندنی داعش دەکەین و بە ڕێز و پێزانینەوە یادی قوربانیدانەکانی پێشمەرگە لە شەڕی دژ بەداعش دەکەینەوە“.
وەزیری بەرگریی ئەمەریکا ئاماژە بەوە دەکات کە ویلایەتە یەکگرتووەکانی ئەمەریکا بەردەوام دەبێت لە هاوکاریکردنی هێزی پێشمەرگە و هێزە ئەمنییەکانی عێراق بۆ ڕووبەڕووبوونەوەی تیرۆریستانی داعش بەتایبەتی لە بواری ڕاوێژکاری و ئاڵوگۆڕی زانیاری و هەواڵگریدا.
لە کۆتایی نامەکەیدا بۆ سەرۆکی حکوومەت، وەزیری بەرگری ئەمەریکا جەخت لەوە دەکاتەوە کە ”پەیوەندییەکی تایبەت لەنێوان هەرێمی کوردستان و ئەمەریکادا هەیە لە سەر بنەمای بەها و ڕێزگرتنی هاوبەش. ئێمە بە خۆشحاڵییەوە، پێشوازی لە کارکردنی هاوبەشی نێوان هەردوولامان دەکەین. سوپاس بۆ پابەندبوونتان بەو هاوبەشییە گرینگەی لە نێوانماندا هەیە“.
کۆمێنت (0)
تا ئێستا هیچ کۆمێنتێک نەکراوە.