رێڤەبەرێ شینواران ل پارێزگەھا دھۆکێ دیار کر کو جھێ چارستین ل باژێرێ دھۆکێ دێ ژ لایێ رێڤەبەریا شینوار و کەلەپۆرێن پارێزگەھا دھۆکێ و ھەر ئێک ژ رێکخراوا یونسکو و کار یا نێڤدەولەتی و ئێکەتیا ئورۆپی ڤە د ناڤ پرۆژێ (پشتەڤانیا رێکێن ژیانێ د رێکا گەشەپێدانا کەلتۆرێ رەوشەنبیری) دا ھێتە نووژەنکرن و سەخبێرکرن.
د.بێکەس بریفکانی، رێڤەبەرێ شینواران ل پارێزگەھا دھۆکێ ئاشکرا کر کو نوکە دەست ب دانانا پلانەکێ و چێکرنا دیزاینەکا جوان بۆ نووژەنکرن و سەخبێرکرنا جھێ چارستین ل باژێرێ دھۆکێ ژ لایێ رێڤەبەریا وان ڤە ھاتیەکرن و ھەر دەمێ کارێ دیزاینێ ب دووماھی ھات دێ دەست ب نووژەنکرنا جھێ ناڤھاتی ھێتەکرن و گۆت: "چ کۆژمێن پارەی بۆ بجھئینانا ڤی پرۆژەی نەھاتینە دیارکرن ژ بەر کو مەزاختیێن پرۆژەی دێ ژ لایێ رێکخراوێن ناڤھاتی ڤە ھێنە دابینکرن و ھەکە دشیان دابوو ھەر د چارچۆڤێ ڤی پرۆژەی دا دێ کارێ نووژەنکرن و سەخبێرکرنێ ژ سەرێ شکەفتا چارستین ھەتا کێلیا (شەدا)ی ژی ب خوەڤە گریت.
ناڤھاتی ئاماژە دا وێ چەندێ کو نووژەنکرن و سەخبێرکرنا جھێ چارستین پێکڤەژیانا ل ھەرێما کوردستانێ ب گشتی و پارێزگەھا دھۆکێ ب تایبەتی ھەیی دیار دکەت، ژ بەر کو ئەڤ جھە یێ ئایینێ زەرەدەشتی یان بوو و گۆت: پشتی ئەڤ جھە ژ نووژەنکرن و سەخبێرکرنێ ب دووماھی دھێت دێ بزاڤان کەین وەکو جھەکێ گەشتیاری بھێتە بکارئینان و داھاتەک بۆ حکومەتا ھەرێما کوردستانێ ژێ بھێت.
ل دووماھیێ رێڤەبەرێ شینواران ل پارێزگەھا دھۆکێ خویا کر کو ھەمی بزاڤ بۆ تۆمارکرنا چەند جھێن شینواری یێن گرنگ ل سنوورێ پارێزگەھا دھۆکێ دھێنەکرن وەکو شکەفتا چارستین و پەرستگەھا لالش و خانیێن کەلەپووری یێن ئامێدیێ و ئاکرێ و جھێ خنس و جەروانە و ھەلامەتا و فەیدیێ.
نووژەنکرنا جھێ چارستین ل دھۆکێ ھاتە ڕاگەھاندن
100%
کۆمێنت (0)
تا ئێستا هیچ کۆمێنتێک نەکراوە.