وۆرکشۆپی ڕێکخستنەوەی سیستەمی ڕێنمایی نەخشەسازی و بیناسازی بەڕێوە چوو

ئەمڕۆ یەكشەممە (12ی كانوونی یەكەمی 2021) بە ئامادەبوونی ساسان عەونی، وەزیری شارەوانی و گەشتوگوزار، وۆركشۆپی "پرۆسه ‌و هه‌نگاوه‌كانی ڕێكخستنه‌وه‌ی سیسته‌می ڕێنماییی نه‌خشه‌سازی و بیناسازی له‌ هه‌رێمی كوردستان ساز كرا و وەزیری شارەوانی و گەشتوگوزاریش لە گوتەیەكیدا جەختی كردەوە كە ئەجێندای ئەو كارە بەشێكە لە كارنامە و پلانی حكوومەتی هەرێمی كوردستان و بە هەموو شێوەیەكیش پاڵپشتیی ڕێنمایی و ڕاسپاردەكانی وۆركشۆپەكە دەبین بە مەبەستی پێشخستنی شار و شارۆچكەكان.
وۆركشۆپەكە پێكهاتووە لە چەند تەوەرێكی سەرەكی، لەوانە: مۆڵەتی بینا، بڕوانامەی تەواوكردنی بینا، ڕێپێدانی پلانسازی كە هەر یەك لەو تەوەرانەش چەندین لق و بەشی جیاوازیان لێ دەبێتەوە و لە ڕێگەی شەش گرووپەوە تاوتوێی چۆنیەتی ڕێكخستنەوەی ڕێنمایی و بەرنامە و پلانسازییەكانی وۆركشۆپەكە دەكرێت و پاشان ڕێنمایی و ڕاسپاردەی پێویست دەردەكرێت، وەك وەزیری شارەوانی و گەشتوگوزاریش لە بەشێكی گوتەكەیدا جەختی لەسەر كردەوە دەبێت شێوازی جێبەجێكردنی ڕێنماییەكان لەسەر ئاستی هەموو شار و شارۆچكەكان وەك یەك بن و هیچ جیاوازییەكیان لەنێوانیاندا نەبێت.
لە بەشێكی تری گوتەكەیدا ساسان عەونی وەزیری شارەوانی و گەشتوگوزار تیشكی خستە سەر گۆڕانكاری و پێشكەوتنی شارەكانی جیهان و هەرێمی كوردستان، لەو سۆنگەیەوە پێداچوونەوە و چاككردنی ڕێنماییەكانی بە پێویستزانی و دووپاتیشی كردەوە كارەكانی ئەو وۆركشۆپەكە بەشێكە لە ئەجێندا و كارنامەی حكوومەتی هەرێمی كوردستان بۆ دووبارە ڕێكخستنەوەی شار و شارۆچكەكانی هەرێمی كوردستان بە ڕەچاوكردنی سەرجەم بنەماكانی نەخشەسازی و شارسازی، هاوكات پاڵپشتیی تەواوی وەزارەتیشی بۆ سەركەوتنی كارەكانی وۆركشۆپەكە ڕاگەیاند و  جەختیشی كردەوە پێویستە لە ڕێنماییەكاندا داواكاریی هاووڵاتییان لەبەرچاو بگیرێت و مامەڵەكانیان بەهۆی ڕۆتینەوە دوانەكەوێت.
وۆركشۆپەكە لەلایەن بەڕێوەبەرایەتیی گشتیی نەخشەدانانی ئاوەدانی لە وەزارەتی شارەوانی و گەشتوگوزار ئامادەكاری بۆ كراوە و بە بەشداری بەڕێوەبەرایەتیی گشتییە شارەوانییەكانی: هەولێر، سلێمانی، دهۆك، هەڵەبجە، گەرمیان، هەروەها سەرۆكایەتیی شارەوانییەكانی: هەولێر، سلێمانی، دهۆك، هەڵەبجە، كەلار، بەڕێوەبەرایەتیی شارەوانییەكانی ڕاپەڕین لەگەڵ بەڕێوەبەرایەتییەكانی نەخشەدانی ئاوەدانی: هەولێر، سلێمانی، دهۆك، گەرمیان و ڕاپەڕین بەڕێوە چوو، تێیدا بە وردی گفتوگۆ لەسەر تەوەرەكان دەكرێت.