رێڤەبەرێ گشتی یێ وەبەرھێنانێ ل پارێزگەھا دھۆکێ ئاشکرا کر کو پرۆژەکێ وەرزشی ل ئیدارا سەربەخۆ یا زاخۆ مۆلەتا وەبەرھێنانێ وەرگرت و پتری سێ ملیۆن دیناران بۆ جێبەجێکرنا ڤی پرۆژەی ھاتینە تەرخانکرن.
کوردو ئیحسان، رێڤەبەرێ گشتی یێ وەبەرھێنانێ ل پارێزگەھا دھۆکێ بۆ ماڵپەرێ فەرمیێ پارتی دیموکراتی کوردستان دیار کر کو ئەڤ پرۆژێ کو مۆلەتا وەبەرھێنانێ وەرگرتی یێ پێکھاتیە ژ سێ مەلەڤانگەھـێن گرتی و ڤەکری و یاریگەھێن تەپا پێی یێن ڤەکری و گرتی و یاریگەھەکا تەپا دەستی و ھۆڵێن لەشجوانیێ و کافتریا و مارکێتێن تایبەت ب کەلوپەلێن وەرزشی و پارک و کەسکاتی و گۆت: "ئەڤ پرۆژە دێ ب کوژمێ سێ ملیۆن و 472 ھزار769 دۆلاران ل سەر رووبەرێ 20 ھزار مەترێن دوجا ل دەڤەرا تلکەبەرێ ل سنوورێ ئیدارا سەربەخۆ یا زاخۆ ھێتە جێبەجێکرن".
ناڤھاتی ئاماژە دا وێ چەندێ کو ھەر دەمێ پرۆژەکێ وەبەرھێنانێ د ڤی بواری دا بھێتە پێشکێشکرن حکومەت وەکو ھەمی بوارێن دی ھەمی ئاسانکاریان بۆ دکەت ئەڤە ددەمەکی دایە کو سیاسەتا وەبەرھێنانێ یا حکومەتا ھەرێما کوردستانێ بەردەوام گرنگیێ ب شیانێن گەنجان و وەرزشێ ددەت و گۆت: "پشتی سەرێ سالا نوی یا زایینی 2022ێ ڤە ئانکو 2022یێ دێ رێڤەبەریا وەبەرھێنانێ ل زاخۆ ھێتە ڤەکرن ژ بەر کو بوویە ئیدارەکا سەربەخۆ و ئێدی دێ ل باژێڕێ زاخۆ خزمەتا وەبەرھێنەر و خەلکی ل وێرێ ھێتەکرن".
پرۆژەکێ وەرزشی ب کوژمێ پتری 3 ملیۆن دۆلاران دێ ل زاخۆ ھێتە چێکرن
100%
کۆمێنت (0)
تا ئێستا هیچ کۆمێنتێک نەکراوە.