ئه‌نجوومه‌نی ئاسایشی نێوده‌وڵه‌تی شه‌وی ڕابردوو له كۆبوونه‌وه‌یه‌كدا به ده‌نگی سه‌رجه‌م ئه‌ندامه‌كانی، كاره‌كانی لیژنه‌ی ڕووبه‌ڕووبوونه‌وه‌ی تیرۆری بۆ 4 ساڵی تر درێژ كرده‌وه، ئه‌و لیژنه‌یه‌ی له ساڵی 2001 دوای هێرشه‌كانی 11ی سێپتێمبه‌ر دروستكرابوو.
ئه‌نجوومه‌نه‌كه له ڕاگه‌یه‌نراوێكدا بڵاوی كرده‌وه: له كۆبوونه‌وه‌یه‌كی تایبه‌تدا بڕیاردرا به درێژكردنه‌وه‌ی كاره‌كانی لیژنه‌ی ڕووبه‌ڕووبوونه‌وه‌ی تیرۆر تا 31ی كانوونی یه‌كه‌می 2025.
درێژكردنه‌وه‌ی ئه‌م چوار ساڵه له‌سه‌ر بنه‌مای ڕاپۆرتی قۆناغه‌كان له مانگه‌كانی ئادار و كانوونی یه‌كه‌می ساڵانی 2022 و 2023 ده‌بێت.
لیژنه‌ی ڕووبه‌ڕووبوونه‌وه‌ی تیرۆر كه 15 وڵاتی ئه‌ندامی ئه‌نجوومه‌نی ئاسایشی نێوده‌وڵه‌تی تێیدا ئه‌ندامن، به بڕیاری ژماره 1373ی ساڵی 2001 دروستكرابوو دوای هێرش و په‌لاماره‌كانی 11ی سێپتێمبه‌ری 2001 بۆ سه‌ر ولایه‌ته یه‌كگرتووه‌كانی ئه‌مه‌ریكا.
ئه‌م لیژنه‌یه ڕێگه به وڵاتانی ئه‌ندام له نه‌ته‌وه‌یه‌كگرتووه‌كان ده‌دات ڕێگری بكه‌ن له جموجۆڵه‌كانی تیرۆریستان له‌سه‌ر خاكه‌كانیان و جیهان به‌شێوه‌یه‌كی گشتی ئه‌ویش به گۆڕینه‌وه‌ی زانیاری و هاوكاری دادوه‌ری و چاودێریكردنی سنوور و ڕووبه‌ڕووبوونه‌وه‌ی سه‌رمایه‌ی تیرۆریستان، لیژنه‌كه پێكهاتووه له 40 ئه‌ندام كه زۆرینه‌یان پسپۆڕن له یاسا نێوده‌وڵه‌تییه‌كان.
کۆمێنت (0)
تا ئێستا هیچ کۆمێنتێک نەکراوە.