ئەفغانستان.. تاڵیبان 3 تۆن خواردنەوەی کحولی کردە رووبارەوە

سەرۆکایەتی هەواڵگریی حکوومەتی تاڵیبان لە ئەفغانستان، سێ تۆن خواردنەوەی کحولی خستە رووباری کابولەوە.
سەرۆکایەتی هەواڵگریی حکوومەتی تاڵیبان، ئۆپەراسیۆنێکی بۆسەر ئەو شوێنە ئەنجامدا کە تیایدا لە ناوچەی کارتی چار لە کابولی پایتەخت خواردنەوە کحولییەکانی تیادا دەفرۆشرا.
لە راگەیەندراوێکی سەرۆکایەتی هەواڵگریی حکوومەتی تاڵیباندا، باس لەوە کراوە کە لە ئۆپەراسیۆنەکەدا، دەست بەسەر سێ تۆن خواردنەوەی کحولیدا گیراوە و سێ کەسیش کە ئەو خواردنەوە کحولییانەیان فرۆشتووە دەستگیرکراون.
لە راگەیەندراوەکەدا هەروەها ئاماژە بەوە کراوە کە خواردنەوەی کحولی حەرامە و پێویستە موسڵمانان خۆیان لە خواردنەوەیان بەدوور بگرن.
لەو گرتە ڤیدیۆیانەی کە لە هەژماری سەرۆکایەتی هەواڵگریی حکوومەتی تاڵیباندا بڵاوکراونەتەوە، دیمەنی رشتنی خواردنەوە کحولییەکان بۆ ناو رووباری کابول بەدی دەکرێت.
دوای ئەوەی تاڵیبان لە 15ی ئابدا ئەفغانستانی کۆنترۆل کرد، لەو کاتەوە تا ئێستا ئۆپەراسیۆن دەکاتە سەر ئەو شوێنانەی ماددەی هۆشبەر و خواردنەوەی کحولییان تیایدا بەرهەم دەهێندرێت و دەفرۆشرێت.