ئەو پیاوەی لەسەر شەقام دەمایەوە هەموو پێداویستییەکی بۆ دابینکرا

پارێزگای هەولێر ڕایگەیاند، لەسەر فەرمانی پارێزگاری هەولێر ئەو پیاوەی لەسەر شەقام دەمایەوە بردرایە خانەی بەساڵاچووان هەموو پێداویستییەکی بۆ دابینکرا.

نووسینگەی ڕاگەیاندنی پارێزگای هەولێر لە بڵاوکراوەیەکدا ئەمڕۆ هەینی ڕایگەیاند: دوای ئەوەی لە چەند کەناڵێکی ڕاگەیاندن بڵاوکرایەوە کە کەسێک بەناوی (محەممەد) بەهۆی ئەوەی 6 مانگە لە ماڵەکەی دەرکراوە و لە گەڕەکی تەیراوە لەسەر شەقام دەمێنێتەوە و هیچ شوێنێکی نییە، لەسەر بڕیاری ئومێد خۆشناو پارێزگاری هەولێر بردرایە خانەی بەساڵاچووان و هەموو پێداویستیەکی بۆ دابینکرا، تیمیکی تەندروستیش ڕاسپێردرا هەموو چارەسەرێکی بۆ ئەنجام بدات.

هەر لە بڵاوکراوەکەدا ئاماژە بەوەشکرا لە ماوەی ڕابردوودا لەلایەن تیمی نووسینگەی پارێزگاری هەولێر دووجاری تر لە 2021.11.28 و 2022.01.05 داوا لە ناوبراو کراوە ببرێت بۆ خانەی بەساڵاچووان و شوێنکی بۆ دابین بکرێت، بەڵام ناوبراو ڕەزامەند نەبووە.