نەوزاد شێخ كامل: ده‌ست به‌دابه‌شكردنی ئارد و به‌شه‌ خۆراكی مانگانه‌ی هاووڵاتییان ده‌كرێت

وه‌زاره‌تی بازرگانی رایگه‌یاند: لە ئایندەیەكی زۆر نزیكدا دەست بە وەرگرتنی بەشە یەكەمی  ئارد  و به‌شه‌ خۆراكی مانگانه‌، بۆ مانگی یه‌كی ئه‌مساڵ ده‌كرێت.
 نەوزاد شێخ كامل، بەڕێوەبەری گشتی بازرگانی ڕایگەیاند: بەردەوامین لە دابەش كردنی به‌شه‌ی خۆراكی ساڵی ڕابردوو كە تا ئێستا بەشێكی كەمی ماوە بگاتە كۆگاكان و ڕۆژانە دوای گەیشتنیان راستەوخۆ دابەش دەكرێت.
 راشیگه‌یاند، به‌شه‌ خۆراكی یەكەمی  ئه‌مساڵیش هەندێكی گەیشتووە و دوای پشكنین كردنیان لە تاقیگەكانی هەرێم، لە نزیكترین كات دابەش دەكرێت.
دەربارەی دابەش كردنی بەشە ئاردی مانگانه‌ به‌سه‌ر هاووڵاتییان، رایگه‌یاندووه‌: كه‌ به‌شی دەیەم كه‌ لە ئێستادا له‌ قۆناغی كۆتاییدایە لە هەموو شارەكان و بەهۆی بارینی باران وخراپ بوونی ڕێگاوبانەكان هەندێك لە ناوچەكان دواكەوتون لە وەرگرتنی و لە نزیكترین كاتدا ئەوبەشە ئاردەش بە تەواوی دابەش دەكرێت.
 نه‌وزاد شێخ كامل ئاماژه‌ی به‌وه‌شكرد: هەروەها سایلۆكان و ئاشەكان خۆیان ئامادە كردووه‌ بۆ وەرگرتنی بەشی یەكەمی گەنم بۆ ساڵی نوێ، لە ئایندەیەكی نزیكدا لە هەرێمی كوردستانیش دەست بە دابەش كردن دەكرێت.
راشیگه‌یاند: هاوڵاتیان دڵنیا دەكەینەوە كە پرۆسەی دابەشكردنی خۆراك وئارد بەسەر هاوڵاتیان لە ڕێگای بریكارەكان بەردەوام دەبێت.