هەندرێن خۆشناو بەشداری لە فێستیڤاڵێکی نێودەوڵەتی کاریکاتێریی لە میسر كرد

رۆژی هەینی 4ی فبرایەر، کۆپی یەکەمی فێستیڤاڵێکی نێودەوڵەتی کاریکاتێریی، بەناونیشانی (گوڵ) لە مۆزەخانەی کاریکاتێر لە شاری فەیوم لە وڵاتی میسردا کرایەوە، ئەم پێشانگایە نێودەوڵەتیەش بە سپۆنسەر و رێکخستنی سەنتەری کاریکاتێریی فەیوم و گۆڤاری ئەلیکترۆنی توماتۆ کارتۆن بوو، و هەتا 15ی مانگ بەردەوام دەبێت.
خاتوو ئەگیار فێرناندێزی باڵیۆزی کوبا لە قاهیرەی پایتەخی میسر، و شێوەکاری میسری محەمەد عەبلە دامەزرێنەری سەنتەری هونەریی فەیوم، و مستەفا شێخ سەرۆکی کۆمەڵەی کاریکاتێریستانی میسر، هەستان بە کردنەوەی ئەم پێشانگا کاریکاتێرییە نێودەوڵەتیە.
هەندرێن خۆشناوی شێوەکار و کاریکاتێریستی ناسراوی کورد، کە کاریکاتێریستیکی پێشەنگە لە بواری هونەری کاریکاتێر لە کوردستاندا، جێی پەنجەی دیارە لەم بوارەدا و خزمەتێکی زۆری هونەری کوردی کردووە، و ئەمساڵ 36 ساڵ تێپەڕێ بەسەر کردنەوەی یەکەم پێشانگای تایبەتی شیوەکاری و کاریکاتێری خۆیدا.
لە دوایین چالاکییە هونەرییەکانی خۆیدا، بەشداریکردن بوو لە فێستیڤاڵی (گوڵ)ی نێودەوڵەتی کاریکاتێریی و کارتۆنی، کە لە شاری فەیومی وڵاتی میسر دوێنێ بەڕێوەبرا.
هەندرێن خۆشناو سەبارەت بەم بەشداریکردنەی لەم فێستیڤاڵەدا گوتی: (404) کاریکاتێریست لە (63) وڵاتەوە زیاتر لە (900) کارتۆنیان بۆ فێستیڤاڵەکە ناردبوو، لێژنەی دادوەری هونەریی فێستیڤاڵەکەش کە لە چەند هونەرمەندێکی (٦) وڵاتەوە پێکهاتبوون، (236) کاری (210) هونەرمەند لە (60) وڵاتەوە پەسەندکرد و لە پێشانگاکە نمایشکران. جێگای شانازییە کە کارەکانی منیش لەنێو کارە سەرکەوتووەکانی پێشانگەکە بوون و بە فیلتەری لێژەنەکەدا تێپەڕین. ئەوەی جێگەی خۆشحاڵی بوو لەم فێستیڤاڵەدا چەند کارتۆنیستێکی کوردی تریش بەشداربوون، ئەوانیش بەڕێزان گرفتار کاکەیی و بەکر عەبدولڕەحمان و جەبار سابیر بوون.
هەندرێنی هونەرمەند سەبارەت بە مەبەستی کردنەوەی ئەم پێشانگایەش گوتی: مەبەست لە کردنەوەی ئەم پێشانگا کاریکاتێریەش، بایەخدان بە گوڵ و رووبەری سەوزایی، و بەرزکردنەوەی ئاستی هۆشیاری ژینگەیی، و هاندانی هاوڵاتیان بۆ پاراستنی ژینگە و بەرەنگاربوونەوەی پیسبوونی ژینگە بوو، ئەمانەش هەمووی لە تابلۆ کاریکاتێری و کارتۆنیەکاندا رەنگیدایەوە.
هەندرێن خۆشناو سەبارەت بە وردەکارییەکانی فێستیڤاڵەکە گوتی: بێجگە لە پێشانگا کارتۆنیە سەرەکیەکە، چەندین چالاکی تریش بەڕێوەدەچن کە بریتین لە ئاهەنگ گێڕان بەبۆنەی ساڵیادی لە دایکبوونی محەمەد عیفەتی کاریکاتێریستی کۆچکردووی میسری، و کردنەوەی پێشانگایەکی پۆرترێتی کاریکاتێری بۆ هونەرمەندی کۆچکردوو، کە بریتی بوو لە 30 کاریکاتێر، هەروەها نمایشکردنی چەند کارێکی هونەرمەندی کۆچکردوو محەمەد عیفەت، هەروەها بەستنی کۆڕێک سەبارەت بە هونەرمەندی ناوبراو و خوێندنەوە بۆ کارەکانی.
ئا- كامران