سهرۆك بارزانی ئهمڕۆ ههینی پهیامێكی پیرۆزبایی ئاراستهی ههردوو ڕێكخراوی یەکێتی قوتابیانی کوردستان و یەکێتی لاوانی دیموکراتی کوردستان كرد بهبۆنهی ساڵیادی دامهزراندنیانهوه.
سهرۆك بارزانی له پهیامهكهدا ڕایگهیاند "ھەر دوو ڕێکخراوی یەکێتی قوتابیانی کوردستان و یەکێتی لاوانی دیموکراتی کوردستان، هەر لە سەرەتای دامەزراندنیانەوە هەتا ئێستا لە قۆناغەكانی خەباتی گەلەکەماندا شوێنی پێگەیاندن و پەروەردەی کوردایەتی و نیشتیمانپەروەری و هۆشیاریی نەتەوەیی بوونە و لەو ڕێگەیەدا قوربانییان داوە و ماندووبوونی زۆریان بینیوە".
سهرۆك بارزانی ڕاشیگهیاند " لە كاتی ئێستاشدا پێویستە قوتابیان و لاوان، لە جاران زیاتر شوێنکەوتووی بەھا بەرزەکانی خەبات و کوردایەتی بن و لە ھەڕەشە و تەحەدییاتەکان نائومێد نەبن".
دهقی پهیامه پیرۆزباییهكهی سهرۆك بارزانی:-
بە ناوی خودای بەخشندە و میھرەبان
بە بۆنەی یادی شەست و نۆیەمین ساڵیادی دامەزراندنی ھەر دوو ڕێکخراوی یەکێتی قوتابیانی کوردستان و یەکێتی لاوانی دیموکراتی کوردستان، پیرۆزبایی خۆم ئاراستەی ھەردوو سکرتاریەتی قوتابیان و لاوان و ھەموو قوتابی و لاوانی خۆشەویستی کوردستان دەکەم و، ھیوای سەرکەوتنیان بۆ دەخوازم.
ھەر دوو ڕێکخراوی یەکێتی قوتابیانی کوردستان و یەکێتی لاوانی دیموکراتی کوردستان، هەر لە سەرەتای دامەزراندنیانەوە هەتا ئێستا لە قۆناغەكانی خەباتی گەلەکەماندا شوێنی پێگەیاندن و پەروەردەی کوردایەتی و نیشتیمانپەروەری و هۆشیاریی نەتەوەیی بوونە و لەو ڕێگەیەدا قوربانیان داوە و ماندووبوونی زۆریان بینیوە.
لە كاتی ئێستاشدا پێویستە قوتابیان و لاوان، لە جاران زیاتر شوێنکەوتووی بەھا بەرزەکانی خەبات و کوردایەتی بن و لە ھەڕەشە و تەحەدییاتەکان نائومێد نەبن. كار بۆ برەودانی فەرهەنگی پێكەوەژیان و فرەیی لە كوردستان بكەن. هاوكاتیش بە زانست و فێربوون و چالاكیی مەدەنیانە خۆیان پڕچەك بكەن و ببنە بەشێكی گرنگ لە كاروانی پێشكەوتن و پتەوتربوونی وڵاتەكەمان و دەوڵەمەندتری بكەن.
دووبارە ئەو بۆنەیە لە هەموو لاوان و قوتابیانی ئازیز پیرۆز بێت و هیوای سەركەوتن و بەردەوامیتان بۆ دەخوازم.
مسعود بارزانی
18ـی شوباتی 2022
کۆمێنت (0)
تا ئێستا هیچ کۆمێنتێک نەکراوە.