وه‌زیری به‌رگریی ئه‌مه‌ریكا دوای كۆبوونه‌وه‌ی له‌گه‌ڵ هاوشانه پۆڵه‌ندییه‌كه‌ی، له كۆنگره‌یه‌كی ڕۆژنامه‌وانیدا كاتی ده‌ستپێكردنی جه‌نگی نێوان ڕووسیا و ئۆكڕانیای ئاشكرا كرد.
لوید ئۆستن وه‌زیری به‌رگریی ئه‌مه‌ریكا ڕاگه‌یاند: هێرشی ڕووسیا بۆ سه‌ر ئۆكڕانیا ڕه‌نگه له هه‌ر كاتێكدا ده‌ست پێ بكات.
ڕاشیگه‌یاند: له‌گه‌ڵ ماریۆش بلاشاك وه‌زیری به‌رگریی پۆڵه‌ندا ڕێككه‌وتووین چه‌كی زیاتریان پێ بفرۆشین به‌تایبه‌تیش زریپۆشی ئه‌برامز.
هه‌روه‌ها ڕایگه‌یاند: هه‌ڵوێستی پۆڵه‌ندا بۆ له‌خۆگرتنی ئه‌و هێزه زۆره‌ی ئه‌مه‌ریكا به‌رز ده‌نرخێنین كه بۆ پاراستنی ئۆكڕانیا لێره‌ن.
لوید ئۆستن گوتیشی: بێگومان ئه‌گه‌ر ڕووسیا هێرشبكاته سه‌ر ئۆكڕانیا، ئه‌وا ئاواره‌یه‌كی زۆر ڕوو له خاكی پۆڵه‌ندا ده‌كه‌ن، ئێمه‌ش به‌هه‌موو شێوه‌یه‌ك پاڵپشتی و هاوكاری ئۆكڕانیا و هاوسێیه‌كانی ده‌بین تا بتوانن به‌رگری له‌خۆیان بكه‌ن.
وه‌زیری به‌رگریی ئه‌مه‌ریكا جه‌ختیشی كرده‌وه كه ڕووسیا هێزێكی زۆر و زیاتری بۆ سه‌ر سنووری ئۆكڕانیا ناردووه، بۆیه هه‌موو ئاماژه‌كان ئه‌وه ده‌رده‌خه‌ن كه ڕووسیا له هه‌ر كاتێكدا بێت هێرش ده‌كاته سه‌ر ئۆكڕانیا.
ئاماژه‌ی به‌وه‌ش دا كه پێویسته له‌سه‌ر ئه‌مه‌ریكا و وڵاتانی هاوپه‌یمانی ناتۆ به‌یه‌كه‌وه ڕووبه‌ڕووی مه‌ترسییه‌كانی ڕووسیا ببنه‌وه و له پاڵپشتییه‌كانیان بۆ هاوپه‌یمانه‌كانیان به‌رده‌وامبن.
کۆمێنت (0)
تا ئێستا هیچ کۆمێنتێک نەکراوە.