له‌پریمه‌رلیگدا ئه‌مشه‌و مانچسته‌ر سیتی میوانداری تۆتنهام ده‌كات

له‌ هه‌فته‌ی بیست وشه‌شه‌می خولی ئینگلته‌راو له‌ یاری لوتكه‌دا، كاتژمێر هه‌شت و سیی خوله‌كی ئه‌م شه‌و به‌كاتی هه‌ولێر، یانه‌ی مانچسته‌رسیتی پێشه‌نگی ڕیزبه‌ندی یانه‌كان و پاڵه‌وانی وه‌رزی ڕابردووی خوله‌كه‌ میوانداری یانه‌ی تۆتنهام ده‌كات.
 ئه‌م یاریه‌ له‌ كاتێكدایه‌ كه‌ مان سیتی به‌ بارودۆخێكی باش تێده‌په‌ڕێت و هه‌نگاو به‌ هه‌نگاو له‌ پارێزگاریكردن له‌ نازناوی پرێمه‌رلیگ نزیك ده‌بێته‌وه‌، سیتیزێنز به‌ كۆكردنه‌وه‌ی شه‌ستوسێ خاڵ له‌ سه‌رووی لیستی ڕیزبه‌ندی یانه‌كان دایه‌و به‌ جیاوازی نۆ خاڵ له‌پێش لیڤه‌رپولی نزیكترین ڕكابه‌ری دێت.
 هاوكات له‌ چامپیۆنس لیگ نیوه‌ی ڕێگای بۆ گه‌یشتن بۆ قۆناغی چاره‌گی كۆتایی بڕیوه‌، ئه‌ویش دوای بردنه‌وه‌ی له‌ گه‌ڕی چوونی قۆناغی شازده‌ له‌ یانه‌ی سپۆرتینگ له‌شبۆنه‌ی میوانداری به‌ پێنج گۆڵی بێ به‌رامبه‌ر، له‌و لاشه‌وه‌ تۆتنهام بارودۆخی خراپه‌و له‌ سێ گه‌ڕی پێشووی خوله‌كه‌ دۆڕاوه‌و ئێستاش به‌ كۆكردنه‌وه‌ی سیی و شه‌ش خاڵ له‌ پله‌ی هه‌شته‌می ڕیزبه‌ندی یانه‌كان دایه‌، له‌ دوو یاری دیكه‌ی هه‌مان هه‌فته‌ی خولی ئینگلته‌را، یانه‌ی لیڤه‌رپول میوانداری یانه‌ی نۆریچ سیتی ده‌كات و یانه‌ی چێڵسی ده‌بێته‌ میوانی یانه‌ی كریستاڵ پاڵاس .