له‌ هه‌ولێر هاووڵاتییه‌ک له‌نێو ئۆتۆمبێله‌که‌ی گیان له‌ده‌ست ده‌دات

به‌ڕێوه‌به‌رایه‌تی به‌رگریی شارستانی هه‌ولێر ئاشكرای كرد كه‌ ئه‌مشه‌و هاووڵاتییه‌كیان له‌نێو ئۆتۆمبێل ده‌رهێناوه‌ كه‌ له‌ هۆشخۆی چووبوو و دواتریش گیانی له‌ده‌ستدابوو.

به‌ڕێوه‌به‌رایه‌تییه‌كه‌ بڵاوی كرده‌وه‌: ئه‌مشه‌و چوارشه‌م و کەمێک پێش ئێستا لەلایەن هاووڵاتییان ئاگادار کراینەوە کە کەسێک لەسەر شەقامی سەرەکی هەولێر - کەرکووک لەناو ئۆتۆمۆبیلەکەی لەهۆش خۆی چووە و دەرگای ئۆتۆمۆبێلەکەشی داخراوە.

ڕاشیگه‌یاند: دەستبەجێ تیمی ڕزگارکردنی بەڕێوەبەرایەتییه‌كه‌مان دەرچوون بۆ شوێنی ڕووداوه‌كه‌ و هاووڵاتییەکەمان له‌نێو ئۆتۆمبێله‌كه‌ی دەرهێنا و ڕاسته‌وخۆ رەوانەی نەخۆشخانە کرا.

هه‌روه‌ها ڕایگه‌یاند: بەداخەوە دوای گه‌یشتنی به‌ نه‌خۆشخانه‌ ڕاگه‌یه‌نرا كه‌ هاووڵاتییه‌كه‌ هه‌ر له‌نێو ئۆتۆمبێله‌كه‌ی گیانی لەدەستداوه‌.

به‌ڕێوه‌به‌رایه‌تی به‌رگریی شارستانی هه‌ولێر ناسنامه‌ی هاووڵاتییه‌كه‌ی ئاشكرا كرد و ڕایگه‌یاند: هاووڵاتییەکە ناوی (دلشاد سلێمان)ه‌ و کارمەندی بەڕێوەبەرایەتی هاتوچۆی هەولێره‌.