قاسم شەشۆ: لە شنگال ئاڵۆزی کەوتووەتە نێوان پەکەکە و ھێزە عێراقییەکانەوە

ماوەی سێ ڕۆژە ھێزێکی زۆری عێراقی لە شنگال جێگیر کراون و خراونەتە ئامادەباشییەوە و فەرماندەیەکی پێشمەرگەی شنگالیش ڕایده‌گه‌ێنێت، کێشە کەوتووەتە نێوان پەکەکە و ھێزە عێراقییەکانەوە و مەترسی لەسەر شنگال ھەیە.
قاسم شەشۆ، فەرماندەی پێشمەرگەی شنگال، بە ماڵپەڕی فەرمیی پارتی دیموکراتی کوردستانی ڕاگەیاند: ماوەی چەند ڕۆژێکە ئاڵۆزی لە سنووری قەزای شنگال پەیدا بووە و ھۆکاری ئاڵۆزییەکەش بۆ ئەوە دەگەڕێتەوە کە پەکەکە دەیەوێت دەسەڵاتی شنگالی بەدەستەوە بێت و ھەموو شتێک ھەر خۆی بێت، ئەوەش بووەتە ھۆی ئەوەی کێشە لە نێوان حکوومەتی عێراق و پەکەکەدا دروست ببێت، حکوومەتی عێراقیش ھێزێکی زۆری ھێناوەتە شنگال.
فەرماندە ئێزدییەکەی شنگال ڕاشیده‌گه‌ێنێت: ئەو ھێزانەی لە شنگال جێگیر کراون، ھێزی نوێی عێراقین و جگە لە سەنتەری قەزای شنگال، لە زۆربەی ناحیە و کۆمەڵگاکانی شنگال بڵاوەیان پێ کراوە و خراونەتە ئامادەباشییەوە بۆ ھەر ئەگەرێک.
قاسم شەشۆ ئاماژەی به‌وه‌شكردووه‌: ڕەوشی شنگال خۆی ئاڵۆزە، پەکەکەش ئاڵۆزتری کردووە بەوەی کە دەیەوێت کێشە بنێتەوە لەنێو شنگالدا، ئەگەر ڕەوشەکە چارەسەر و کۆنتڕۆڵ نەکرێت، بێ گومان دەگاتە ئاستی پێکدادان لە نێوان ئەو ھێزانەی سەر بە پەکەکەن لەگەڵ هێزەکانی حکوومەتی فیدڕاڵیی عێراق.