سه‌رۆكی ئه‌مه‌ریكا ڕه‌زامه‌ندی نیشانداوه له‌سه‌ر ناردنی هێزی زیاتری وڵاته‌كه‌ی بۆ ڕۆژهه‌ڵاتی ئه‌وروپا و هێزه‌كانیش له‌چه‌ند ڕۆژی داهاتوودا ده‌گه‌نه شوێنی مه‌به‌ست.
ئاژانسی ده‌نگوباسی (CNN) له‌سه‌ر زاری به‌رپرسێكی باڵای ئه‌مه‌ریكا گواستییه‌وه: جۆ بایدن سه‌رۆكی ئه‌مه‌ریكا ڕه‌زامه‌ندی نیشانداوه و فه‌رمانی كردووه له چه‌ند ڕۆژی كه‌می داهاتوودا هێزی زیاتری وڵاته‌كه‌یان ڕه‌وانه‌ی ڕۆژهه‌ڵاتی ئه‌وروپا بكه‌ن.
بڵاویشی كرده‌وه: ناردنی ئه‌و هێزه نوێیه‌ی ئه‌مه‌ریكا بۆ ناوچه‌كه به‌هۆی مه‌ترسی جووله‌ی سه‌ربازییه‌كانی ڕووسیایه له نزیك ئۆكڕانیا.
ئاماژه‌ی به‌وه‌شدا كه پێشبینی ده‌كرێ هێزه زیاده‌كه پێك بێت له جێگیركردنی 2 هه‌زار سه‌ربازی ئه‌مه‌ریكی له پۆڵه‌ندا له‌گه‌ڵ چه‌ند هه‌زارێكی تر له ڕۆمانیا و چه‌ند وڵاتێكی تری ڕۆژهه‌ڵاتی ئه‌وروپا.
ئاژانسه‌كه جه‌ختیشی كرده‌وه كه ئه‌مه‌ریكا 8 هه‌زار و 500 سه‌ربازی تری وڵاته‌كه‌ی خستۆته حاڵه‌تی ئه‌وپه‌ڕی ئاماده‌ییه‌وه له ئه‌گه‌ری هێرشی ڕووسیا بۆ سه‌ر ئۆكڕانیا.
کۆمێنت (0)
تا ئێستا هیچ کۆمێنتێک نەکراوە.