یەکێتی زانایانی ئیسلامی کوردستان لە ڕاگەیەنراوێکدا ئیدانەی سوکایەتیکردن بە پیرۆزییەکانی ئیسلام و موسڵمانان دەکات و ڕایدەگەیەنێت، هەوڵێکە بۆ تێکدانی ئاشتی کۆمەڵایەتی و پێکەوەژیان.
یەکێتی زانایانی ئایینی ئیسلامی کوردستان ئەمڕۆ هەینی ڕاگەیەنراوێکی بڵاوکردۆتەوە و تێیدا هاتووە "دوای ئەوەی لە چەند ڕۆژی ڕابردوو لە گرتەیەکی ڤیدیۆیی هونەرمەندێک سوکایەتی بە پیرۆزییەکانی ئیسلام کرد و کاردانەوەی زۆری بەدوای خۆیدا هێنا، یەکێتی زانایان ئیدانەی ئەو سوکایەتیانە دەکات".
دەقی ڕاگەیەنراوی یەکێتی زانایانی ئایینی ئیسلامی کوردستان:-
لە ماوەی رابردوو هونەرمەندێکی یارسانی کوردستانی رۆژهەڵات لە گرتەیەکی ڤیدیۆیی سوکایەکی بەرامبەر پیرۆزییەکانی ئیسلام بڵاوکردەوەو بەهۆیەوە هەستی موسڵمانانی بریندار کرد، ئێمە لە یەکێتی زانایانەوە ئیدانەی ئەو سوکایەتیانە دەکەین و پێمان وایە ئەم جۆرە کارانە هەوڵێکە بۆ تێکدانی ئاشتی کۆمەڵایەتی و پێکەوەژیان و پێویستی بە داوای لێبوردن لە موسڵمانان هەیە، خەڵک بۆ خۆی ئازادە چۆن بیر دەکاتەوە، بەڵام ئازاد نییە لەوەی سوکایەتی بە ئایینی ئیسلام بکات و ناکرێ رێگە بەوە بدرێت ئەو پێکەوەژیانەی هەیە لەبار بچێت و ئاشتی کۆمەڵگە بشێوێندرێت، چاوەڕوان بووین سەندیکای هونەرمەندان لەبەیاننامەکەیاندا ئیدانەی ئەو جۆرە رەفتارانەی کردبووایە کە بۆتە هۆکاری برینداربوونی هەستی موسڵمانان، لەهەمان کات ئەرکی داواکاری گشتیە رۆڵی خۆی ببینێت و لەو حاڵەتانە بێتە دەنگ بە ئەرکی پێویست هەڵبستێت.
هەر لەو چوارچێوەیەدا بە پێویستی دەزانین دەستخۆشی و سوپاسی هەڵوێستی بەرزی زانایانی کوردستانی رۆژهەڵات بەتایبەت شاری پارە بکەین، کە بە پەیامی حەکیمانە و لە پێناو دامرکاندنەوەی دۆخی بەرهەمهاتووی ئەم رووداوە نەخوازراوە، رەنج و ماندوو بوونیان کێشا و لە ئاستی پێویست هەڵویستیان وەرگرت.
یەکێتی زانایانی ئایینی ئیسلامی کوردستان
کۆمێنت (0)
تا ئێستا هیچ کۆمێنتێک نەکراوە.