کونسوڵی ئیتاڵیا لە هەولێر لە دیدارێکدا لەگەڵ پارێزگاری هەولێر ڕایگەیاند، لەسەر ئاستى وەزارەتى دەرەوە و باڵیۆزخانە و کونسڵخانە بەتووندى ئیدانەى ئەو هێرشە دەکەن و پاڵپشتى خۆیان بۆ هەرێمى کوردستان دووپات دەکەنەوە.
نووسینگەی ڕاگەیاندنی پارێزگای هەولێر ڕایگەیاند: پێشنیوەڕۆی ئەمڕۆ دووشەممە ئومێد خۆشناو پارێزگاری هەولێر لە دیوانى پارێزگا پێشوازی لە مێکێلێ کامێرۆتا، کونسوڵى ئیتاڵیا لە هەولێر کرد.
ڕاشیگەیاند: لە دیدارەکەدا وێڕاى ئەوەى جهخت له پتهوكردنى پەیوەندییەکان و ههماههنگى و كاركردنى ههردوولا کرایەوە، هەردوولا جەختیان لە پەیوەندی پتەوی دوولایەنەی نێوان حکوومەتی هەرێمی کوردستان و وڵاتى ئیتاڵیا کردەوە.
ئاماژەی بەوەشدا کە لەلایەن خۆیەوە کونسوڵى ئیتاڵیا لە هەولێر بەتووندی سەرکۆنەی ئەو پەلامارەی کرد کە کرایە سەر هەولێری پایتەخت و خەڵکی سڤیلی شارەکە و رایگەیاند: لەسەرئاستى وەزارەتى دەرەوە و باڵیۆزخانە و کونسوڵخانە بەتووندى سەرکۆنەی ئەو هێرشە دەکەین و پاڵپشتى خۆمان بۆ هەرێمى کوردستان دووپات دەکەینەوە، ئێمە هاوپەیمان بووین لەشەڕى تیرۆریستانى داعش و ئیستاش بەردەوامین لە هاریکارى پێشمەرگە و دەخوازین بەردەوام بین.
ئەوەش خراوەتەڕوو کە پارێزگاری هەولێر لە دیدارەکەدا دووپاتی کردەوە، ئارامی و سەقامگیری و ئاسایشى هەولێری پایتەخت بەمجۆرە کارە ترسنۆکانە تێکناچێت، هەولێر وەک قەڵاکەی هەمیشە بەسەربەرزی دەمێنێتەوە.
کۆمێنت (0)
تا ئێستا هیچ کۆمێنتێک نەکراوە.