بەری 34 سالان لەشێن پاقژ و بژوین پرت و بەلاڤەبوون، و نەفس و روحێن پاک ل جادە و کولانێن هەلەبجەیا شەهید بێدەنگ مان، و هندەکێن دی بزاڤا ژیان و مانێ دکرن، ژبەر ڤیان و گرێدان بۆ وەلاتی، و ئاشتی و ئازادێ، کو هەتا نوکە ژبەر ئێش و نەخوشی و دەردەسەرییان دنالن.
ددەمەکی دا کو ئەم ڤێ کارەساتا ب ئێش و دژوار ب بیردێنین کو بوویە ئەگەرێ وێرانکرنا مرۆڤان و عەردێ ل ڤی باژێرێ تەنا و خۆڕاگر، د هەمان دەم دا بەژنا خۆ دچەمینین وەک رێزگرتنەک بۆ گیانێ شەهیدێن زارۆک و ئافرەت و پیران، هیڤخوازین بۆ وان بەرکەفتێین چەکێن کیمیایی ئەوێن ژلایێ ناڤدەولەتیڤە هاتینە قەدەخەکرن کو هێشتا ژبەر کارتێکرن و پاشمایێن وان دنالن، ب زویترین دەم ساخ و چارەسەر ببن.
ل گەل ب بیرهینانا مە بۆ ڤێ تاوانا دڕندە ئەڤا رژێما بەرێ دژی خەلکێ سڤێل یێ بێ چەک و بێ گونەهـ کری، د هەمان دەم دا، داخوازێ ژ حکومەتا فێدراڵ دکەین کو پێدڤی یە قوربانیێن ڤێ کارەساتێ ب شێوەیەکێ دادپەروەرانە بهێنە قەرەبوووکرن، ل دویڤ قەبارە و مەزنی یا ڤێ تاوانێ و نەخشە و پلان و بەرنامەیێن دومدرێژ بۆ گەشەپێدانا باژێڕێ و بەردوامدان ب جهێینانا پروژەیێن ئاڤەدانکرن و خزمەتگوزاریێ و پویتە و گرنگیپێدانەکا پتر ب ڤی باژێڕێ بهێتە دان کو بوویە هێمایەکێ خۆڕاگری و قوربانیدانێ.
نەمری بۆ شەهیدێن هەلەبجە و سلاڤ بۆ کەسوکارێن قوربانییان و سەربلندی و سەرفەرازی بۆ خەلکێ هەلەبجەیا شەهید.
فراکسیۆنا پارتی دیموکراتی کوردستان
ل پەرلەمانێ عیراقێ
16ی ئادارێ 2022
کۆمێنت (0)
تا ئێستا هیچ کۆمێنتێک نەکراوە.