ده‌سه‌ڵاتدارانی ویلایه‌تی تێكساس له ئه‌مه‌ریكا ئاشكرایان كرد، ئه‌مڕۆ هه‌ینی له ڕووداوێكی هاتوچۆ له‌نێوان دوو ئۆتۆمبێل 9 كه‌س گیانیان له‌ده‌ست دا.
ڕاشیانگه‌یاند: ڕووداوه‌كه به‌هۆی پێكدادانی ئۆتۆمبێلێك له جۆری پیكاب كه منداڵێكی ته‌مه‌ن 13 ساڵان لێی ده‌خوڕی له‌گه‌ڵ پاسێك كه تیپێكی زانكۆی یاریزانانی گۆڵفی ده‌گواسته‌وه ڕوویداوه.
به‌هۆی ڕووداوه‌كه 6 یاریزانی تیپه‌كه و ڕاهێنه‌ره‌كه‌یان له‌گه‌ڵ منداڵه ته‌مه‌ن 13 ساڵییه‌كه و باوكی گیانیان له‌ده‌ستداوه.
هۆكاری پێكدادانه‌كه‌ش پیكابه‌كه بووه كه چۆته شه‌قامی پێچه‌وانه‌ی ڕێگاكه و به خێراییه‌كی زۆر خۆی كێشاوه به پاسه‌كه و له ئه‌نجامدا هه‌ردوو ئۆتۆمبێله‌كه گڕیان گرتووه.
به‌گوێره‌ی لێكۆلینه‌وه سه‌ره‌تاییه‌كانی تیمی هاتوچۆی ویلایه‌تی تێكساس پێش دروستبوونی ڕووداوه‌كه، یه‌كێك له تایه‌كانی پێشه‌وه‌ی پیكابه‌كه ته‌قیوه و بووه‌ته هۆكاری له‌ده‌ست ده‌رچوونی كۆنتڕۆل و چووه‌ته ئه‌وبه‌ری شه‌قامه‌كه.
به‌پێی یاساكانی هاتوچۆ له ویلایه‌تی تێكساس شوفێر ده‌بێت 15 ساڵی ته‌واو كردبێت ئینجا مۆڵه‌تی لێخوڕینی ئۆتۆمبێلی پێ ده‌درێ، ئه‌مه‌ش ده‌ری ده‌خات كه ئۆتۆمبێله پیكابه‌كه خه‌تاباری سه‌ره‌كی ڕووداوه‌كه بووه.
کۆمێنت (0)
تا ئێستا هیچ کۆمێنتێک نەکراوە.