وەزیری ئەوقاف و کاروباری ئایینی پێشوازی لە سەرۆکی دیوانی وەقفی سووننی عێراق دەکات و لە سەردانەکە سوپاسی حکوومەتی هەرێمی کوردستانی کرد لەبەرامبەر ئەوەی بووەتە پەناگە بۆ ئاوارە و پێکھاتە جیاوازەکان.
وەزارەتی ئەوقاف و کاروباری ئایینی ڕایگەیاند: ئەمڕۆ شەممە پشتیوان سادق وەزیری ئەوقاف وکاروباری ئایینی و بە بەشداری پێکھاتە ئایینیەکان پێشوازی لە شێخ عەبدولخالق عەزاوی سەرۆکی وەقفی سوونی عێراق و شاندێکی یاوەری کرد.
ڕاشیگەیاند: لەدیدارەکە سەرۆکی وەقفی سووننی سوپاسی حکوومەتی ھەرێم و خەڵکی کوردستانی کرد لە پێشوازی و خزمەتکردنی ئاوارەکانی خەڵکی سووننە و پێکھاتەکانی دیکەی عێراق کە بەھۆی جەنگە جیاوازەکانەوە ڕوویان لە ھەرێم کردووە.
ئاماژەی بەوەشدا کە عەبدولخالق عەزاوی جەختی کردەوە کە ھەولێر پایتەختی ھەمووانە و شاری ئاشتی پێکەوەیی و لێبووردەییە، ھەر لەدیدارەکەدا لەبەرامبەر پرۆژە و کارەکانی بۆ ئاشتی و پاراستنی مافی ھەمەلایەنەی پێکھاتە جیاوازەکان قەڵخانی ئاشتی بەخشیە وەزیری ئەوقاف و کاروباری ئایینی.
ئەوەشی خستەڕوو کە لە تەوەرێکی دیکەی دیدارەکەدا باس لە ناڕەوایەتی هێرشی ئێران بۆ هەولێر کرا.
کۆمێنت (0)
تا ئێستا هیچ کۆمێنتێک نەکراوە.