بەڕێوەبەری گشتیی گەشتوگوزاری سلێمانی ئەمڕۆ شەممە ڕایگەیاند کە لەماوەی سێ ڕۆژی ڕابردوو زیاتر لە 20 هەزار گەشتیار هاتوونەتە شارەکە.
عەلی ڕەئووف بەڕێوەبەری گشتی گەشتوگوزاری سلێمانی لە کۆنگرەیەکی ڕۆژنامەوانی ڕایگەیاند: سەبارەت بەو دەنگۆیانەی باس لە قۆرخکاری لە کابینەکانی دووکان دەکرا، سەردانی ئەو شوێنانەمان کرد و دەرکەوت ئەو هەواڵانە دوورن لە ڕاستییەوە.
لەمبارەیەوە عەلی ڕەئووف ڕاشیگەیاند: بەشێک لەو کابینانەی کە بە نرخی 500 دۆلار دەدرێت بە هاووڵاتییان دوو نهۆمن و شوێنی چەند خێزانێکی تێدا دەبێتەوە، بۆیە بەم نرخە دەدرێت بە هاووڵاتییان.
لەبارەی ئاماری گەشتیارانیشەوە هەروەها گوتی: پێشبینی ئامارێکی زۆر دەکەین، ئێستا 80% هۆتێل و مۆتێلەکانی شارەکە گیراون، چاوەڕێ دەکرێت ئەمڕۆ بەتەواوی پڕببن لە میوان.
گوتیشی: لەماوەی 3ڕۆژی ڕابردوو زیاتر لە 20 هەزار کەس هاتوونەتە سنووری پارێزگای سلێمانی گەشتیارەکانیش لە ناوەڕاست و خوارووی عێراق و ڕۆژهەڵاتی کوردستان سەردانی شارەکەیان کردووە.
ئاماژەی بەوەش دا هەموو ڕێکارێکی ئەمنی گیراوەتەبەر بۆ پاراستنی گیانی گەشتیاران.
کۆمێنت (0)
تا ئێستا هیچ کۆمێنتێک نەکراوە.