تورکیا: ڕووسیا و ئۆکراینا نزیکن لە لێکتێگەیشتن

ئەنقەرە ئەمڕۆ یەکشەممە ڕایگەیاند، مۆسکۆ و کیێڤ لە دانووستانەکانی نێوانیان بۆ کۆتاییهێنان بە هێرشەکانی ڕووسیا بۆ سەر ئۆکراینا لە لێکتێگەیشتن نزیکن.

مەولود چاوشئۆغڵو وەزیری دەرەوەی تورکیا ڕایگەیاند: بێگومان ئاسان نییە شەڕ بەردەوام بێت و هاووڵاتییان بکوژرێت، بەڵام ئەم تەوژمە تاوەکو ئێستاش بەردەوامە.

لە درێژەی قسەکانیدا جەختیشی کردەوە کە هەردوو وڵاتەکە نزیکن لە لێکتێگەیشتن.

ئەوەشی خستەڕوو کە تورکیا پەیوەندی بەردەوامی لەگەڵ دانووستانکارانی ڕووسیا و ئۆکراینا هەیە و ڕەتیشی کردەوە هیچ وردەکارییەکی کۆبوونەوەکان ئاشکرا بکات.

وەزیری دەرەوەی تورکیا جەختیشی کردەوە کە وڵاتەکەی ڕۆڵێکی ڕاستگۆیانە و هاوسەنگی دەبێت بۆ نێوەندگیری لەنێوان هەردوو وڵات.

بەهۆی پەیوەندییە بەهێزەکەی ئەنقەرە لەگەڵ هەردوو وڵات، چاوشئۆغڵو بۆ نێوەندگیری لەنێوانیان لەم هەفتەیەدا سەردانی ڕووسیا و ئۆکراینای کرد.

هاوکات هەر ئەمڕۆ یەکشەممە ڤۆلۆدیمێر زیلینسکی سەرۆکی ئۆکراینا ئاماژەی بەوە دا کە ئەگەر دانووستانەکانی نێوانیان لەگەڵ ڕووسیا شکست بهێنێت، بە مانای سەرهەڵدانی جەنگی جیهانی سێیەم دێت. جەختیشی کردەوە کە ئامادەیە بۆ دانووستان و بەبێ دانووستان جەنگ ناوەستێت.